भांगरभूंय | प्रतिनिधी
पणजी: गोंयच्या मोले-कासावले एके वेगान येवपी व्हॉल्वो बसीन फुडल्या पर्यटकांच्या वाहनाक फाटल्यानच्यान नेटान धपको दिलो. ह्या अपघातांत तामिळनाडूचे एके गुरवार बायले सयत वट्ट पांच जाण जखमी जाले.
अपघात जाल्ल्या वाहनाचे चालक निजाम हांणी दिल्ले म्हायती प्रमाण, तामिळनाडूच्या होसूर हांगच्यान तांचें कुटूंब पर्यटना खातीर गोंयांत आयिल्लें. उत्तर गोंयांत वतना एके व्हड व्हॉल्वो बसीन ताचे गाडयेक नेटान धपको दिलो. हो धपको इतलो नेटान बसलो, पर्यटकांचें वाहन दोन फावटीं पलट्यो मारून कुशीक वचून पडलें. ही घडणूक बिरेस्तारा घडली.
गुरवार बायले सयत ल्हान भुरगीं वाटवलीं
अपघात जालो तेन्ना गाडयेंत ३ बायलो, २ दादले आनी तीन ल्हान भुरगीं प्रवास करतालीं. ह्या अपघातात एके ३ म्हयन्यांचे गुरवार बायलेक गंभीर दुखापत जाली, जाल्यार एका दादल्याच्या पायांक लागलें. तशेंच हेर प्रवाशांक मार लागला. ह्या वाहनांत आशिल्लीं तीन भुरगीं वाटवलीं. अपघाता उपरांत थळाव्या नागरिकांचे मजतीन सगल्या जखमींक बेगोबेग ऍम्बुलन्सींतल्यान उपचारा खातीर हॉस्पिटलांत दाखल केले.
बस चालकाक फर्मागुडयेर घेतलो ताब्यांत
अपघात जाले उपरांत व्हॉल्वो बस चालकान अपघाताचे सुवातेर रावनासतना बसी सयत थंयच्यान पळ काडिल्ली. मात, हे घडणुकेची म्हायती मेळटांच पुलिसांनी नाकाबंदी करून फरारी बसीचो सोद घेतलो आनी निमाणें बस चालकाक ताब्यांत घेतलो. ह्या प्रकरणाचो फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
