भांगरभूंय | प्रतिनिधी
पणजी : राज्यांतल्या सामान्य नागरिकां सयत खाजगी कंपन्यो, उद्देग मळान हस्तकला उत्पादनां विकत घेवपाक प्राधान्य दिवचें. हीं उत्पादनां पर्यावरणाचो तोल राखपा खातीर उपेगी थारतलीं. अशीं उत्पादनां घेतल्यार थळाव्या कारागिरांक फायदो जातलो, अशें प्रतिपादन मुख्यमंत्री डॉ. प्रमोद सावंत हांणी केलें. कला अकादमींत ट्रायबल क्राफ्ट प्रदर्शनाच्या उक्तावणा वेळार ते उलयताले. ह्या वेयार मंत्री रमेश तवडकार, बाबू कवळेकार, खात्याचे संचालक सगुण वेळीप आनी हेर अधिकारी हाजीर आशिल्ले.
सरकारान कुणबी साडी, शाल हांचे सयत हेर हस्तकला उत्पादनांक प्राधान्य दिलां. राज्यांत कोणूय सरकारी सोयरीं आयल्यार तांकां कुणबी साडी, शाल भेट म्हणून दितात. हाका लागून आतां कुणबी कला देशभर पावल्या. स्वयंपूर्ण गोंय करपा खातीर आमी गरजेवंतांक कुशळ प्रशिक्षण दितात. ग्रामीण भागांतल्या उद्देजकांक चालना मेळचे खातीर येवजण्यो सुरू केल्यात. थळावी हस्तकला तिगून रावचे खातीर आतां खाजगी क्षेत्रान फुडाकार घेवप गरजेचें.
राज्य सरकार हस्तकला कारागिरांक प्राधान्य दितात. कारागिरांक प्रशिक्षण दिवप, आधुनीक उपकरणां दिवप, तांकां बाजारपेठ उपलब्ध करून दिवप अशीं जायतीं कामां करतात. आतां मेरेन २०० परस चड विणकाम यंत्रां दिल्यांत. जाल्यार ३०० प्रशिक्षण शिबिरां आयोजीत केल्यांत. आतां मेरेन सरकारान २ हजार परस चड हस्तकला कारागिरांक मजत करतात. तशेंच बहुजन समाजांतली बायल स्वयंसहाय्यता गटांकूय अर्थीक मजत केली, अशें तांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
