भांगरभूंय | प्रतिनिधी
पक्ष उबारपा खातीर मनोज, विरेशाचे कश्ट तोखणाय करपा सारके
पणजी : धर्म आनी जातीच्या आदाराचेर खंयचोच पक्ष चलपाक शकना. धर्म आनी जातीच्या आदाराचेर पक्ष तयार जावप ही गोंयां खातीर घातक गजाल आसा, अशें मुख्यमंत्री डॉ. प्रमोद सावंत हांणी म्हणलां. आरजी पक्षा मदल्या भितरल्या वादा उपरांत मनोज परब हांणी आरजी अध्यक्षपदाचो राजिनामो दिलो. हाचे उपरांत पयलेच खेपो सविस्तरपणान मुख्यमंत्र्यांनी भाश्य केलें.
आरजी ही चळवण २०१६ वर्सा सुरू जाली. उपरांत २०२१ वर्सा पक्ष स्थापन जालो. थळाव्या पक्षाविशीं लोकांक उमळशीक आसता. पयलेच वेंचणुकेंत आरजीक १० टक्के मतां मेळ्ळीं. तशेंच आमदार म्हूण विरेश बोरकार वेंचून आयले. वट्ट आमदार वेंचून आयलो तरी पयलेच वेंचणुकेंत १० टक्के मतां मेळप ही व्हड गजाल आसा. पक्ष स्थापन करून तो वाडोवपा खातीर मनोज परब तशेंच विरेश बोरकार हांणी खूब कश्ट घेतल्यात. तांचे कश्ट हे तोखणाय करपा सारके आसा. हांव राष्ट्रीय पक्षाखातीर १९९६ सावन वावुरतां. हांवें लेगीत बरेच कश्ट घेतल्यात. आमदार म्हूण लेगीत विरेश बोरकार हांची कामगिरी तोखणाय करपा सारकी आसा.
फाटले चार दीस तांचे वायरल जाल्ले पोस्ट आनी व्हिडीयो हांवें पळयले. हे पोस्ट जात आनी धर्माचेर आधारीत आसा. कांय जाणांनी देवांचेर वेगवेगळी वक्तव्यां केल्यांत. मनोज परब हो खंबीर फुडारी आसा. तांणी राजीनामो दिवप ही दुर्दैवी गजाल आसा. फुडें किदें जातलें, हें म्हाका खबर ना. आरजी हो विरोधी पक्ष आसलो तरी तांच्या पक्षाक म्हजीं परबीं, अशें डॉ. सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
