भांगरभूंय | प्रतिनिधी
पणजी : गोंयांत सरकारी नोकर्या विशीं विशेश क्रेझ आसा. सगल्या मतदारसंघांतल्या तरणाट्यांक सरकारी नोकरेची अपेक्षा आसा. सध्या विवीध सरकारी खात्यांनी २२ हजार रितीं पदां आसात. मुख्यमंत्री डॉ. प्रमोद सावंत हे जादूगार आशिल्ल्यान ते विधानसभा वेंचणुके पयलीं ह्यो सुवातो भरतले अशी खात्री आसा. अशें काम फकत भाजप पक्षूच करपाक शकता, अशें प्रतिपादन भलायकी मंत्री विश्वजीत राणे हांणी केलें. शुक्रारा पणजी जाल्ले नर्सींग परिशदे उपरांत तांणी माध्यमां कडेन संवाद सादलो.
आमी एक संघ म्हणून काम करतात. फकत एकाच मतदारसंघा खातीर न्हय पुराय राज्या खातीर काम करतात. तरणाट्यांक सरकारी नोकरेची अपेक्षा आसा. तांच्यो अपेक्षा आमचे मेरेन पावतात. मुख्यमंत्र्यांकूय राज्यांतल्या तरणाट्यांची काळजी आसा. हाका लागून वेंचणुके पयलीं रितीं २२ हजार पदां भरतले, असो विस्वास आमकां आसा. अशें जाल्यार तरणाट्यांक समाधान जातलें. आमी केल्ल्या उदरगतीच्या कामांक लागून फुडले सरकारूय भाजपाचेंच आसतली ही खात्री आसा, अशें तांणी मुखार म्हणलें.
ताचे पयलीं जाल्ले कार्यावळींत राणे हांणी सांगलें, फाटल्या कांय वर्सांनी राज्यांतल्या भौशीक भलायकी मळार व्हड उदरगत जाल्या. सरकारी हॉस्पिटलांनी आधुनीक उपकरणां, प्रशिक्षीत नर्स, डॉक्टर उपलब्ध आसात. दुयेतींच्यो सरकारी नर्स कडल्यान खूब अपेक्षा आसतात. मात नर्स कितलें काम करता हें तांकां खबर नासता. अशें जरी आसलें तरी नर्सीनी प्रेमळ रावन काम करप गरजेचें. राज्यांत बेगीनूच नर्सरी कॅन्सरचें हॉसपिटल सुरू जातलें. हांगा ५०० ते ६०० नर्स खातीर नोकर्यो उपलब्ध जातल्यो, अशेंय राणे हांणी मुखार सांगलें.
म्हज्या बोल्सांतल्यान पगार दितां
सध्या गोंय वैजकी महाविद्यालयांतल्या पेडियाट्रीक रिहाब तशेंच आयव्हीएफ केंद्रांतल्या कांय कर्मचार्यांचो पगार हांव म्हज्या बोल्सांतल्यान दितां. असल्या कर्मचार्यांक सीएसआर निधींतल्या पगार दिवप शक्य आसा. ह्या कर्मचार्यांक कंत्राटी करपा विशीं हांवें सरकारा कडेन फायल धाडल्या. हे विशीं हांव सरकारकडेन फायल धाडल्या. हे विशीं हांव मुख्यमंत्र्यां वांगडा चर्चा करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
