भांगरभूंय | प्रतिनिधी
अखेरेक आरजीपीच्या संस्थापक फुडाऱ्यां मदले एक मनोज परब पक्षांतल्यान भायर सरले. तळागाळांतल्या गोंयकारांक धपको दिवपी ही गजाल. मध्यानरातीं पडिल्लें सोबीत सपन फांतोड जावचे पयलींच सोंपलें. पावसाचे पयले दडके उपरांत जमनीक थंडाय मेळटकच तायखिळो तकली वयर काडटा तसो आरजी पक्ष गोंयांत किल्लतालो, मात तातूंतलीं कांय रोपां कोणेतरी माड्डिल्लीं. मनोज सध्या भायर सरल्यात. राजसंन्यास घेवपाचीय घोशणा केल्या. आरजीक आदेवश करतना कांय जाणांक मिडिया मुखार रडपाक आयलें. थोड्यांक ती नाटकां दिसलीं, तरी रक्त, दुकां शिंपून वयर काडिल्लो आपलो पक्ष सोडचो पडटा, तेन्ना दुख्ख हें जाताच. मात, हें सगलें घडलें कित्याक, ताची जाप गोंयकारांक मेळटली? हाचे फाटल्यान वैयक्तीक, समाजीक, राजकी काय अर्थीक कारणां आसात? आतां आरोप, प्रत्यारोप सुरू जातलें.
आरजीपींतल्यान एकले मनोजूच वेगळे जाल्यात कांय तांचे लागींचे वांगडीय? मनोज हांचो राजिनामो मेळ्ळा, पूण आतां पक्षाचो एकूय वांगडी राजिनामो दिवंचो ना. पक्ष मुखार वतलो, अशें आरजीपीच्या जाळवणदारांनी म्हणलां. “गोंयकारां खातीर लढपाच्या सपनांतल्यान एक क्रांती सुरू केल्ली. आयज ती बुरश्या राजकारणांत बदल्ल्या. व्यक्तीकेंद्रीत सत्तेच्या राजकारणा मेरेनच्या ह्या प्रवासान म्हाका पुरायपणान नाऊमेद केलो,” अशें मनोज हांणी काल सांगलें. मनोज आनी विरेश हे आरजीचे खांबे. एकाच घरा भितर दोन चुली जाल्ल्यो खंय. भितरले एके चुलींतलो उजो पालवला, अशें कांय राजकी जाणकारांचें मत, पूण व्यक्ती परस पक्ष श्रेश्ठ आसूंक नाका? पक्षांत दोन गट आसतकच वाद, कोडसाण वाडटा, ताचो पक्षाचेर परिणामूय जाता. म्हणून ते मतभेद, मनभेद पक्षांतर्गत बसका घेवन सोडोवपाचे आसतात. बसका आपयिल्ली, पूण विरेश येवंक ना, असो एक गट म्हणटा, तर दुसरो तो गोंया भायर आसा, अशें सांगता. आतां कालचे घडामोडीक लागून बसकेची शक्यताय तशी उणीच आसा. मनोजा फाटल्यान आनीक कोण राजिनामो दितात, हाचे कडेन थोड्यांचें लक्ष आसा.
‘एक आमदार वेंचून येतकच पक्ष राजकी मार्गाचेर चलपाक लागलो आनी अंतर्गत राजकारण सुरू जालें, सत्तेचो मोह वाडपाक लागलो. आपणाचेर कितें उलोवचें कितें ना, ताचीं बंधनां येवपाक लागलीं, पक्ष ताब्यांत घेवपाचो यत्नूय जालो’, असो आरोप मनोज परब हांणी केला.
आरजीपीची विचारसरणी, तत्वां आसात, तीं कांय विरोधी पक्षांक लागीं वचपी. फाटल्या स वर्सांत पक्षांचे कांय फुडारी दुसरे कडेन गेल्यात, थोड्यांचेर कारवायूय जाल्या. मयेंचे फुडारी श्रीकृष्ण परब हांणी थोडे जाण आपल्याक आवडना, ते व्यक्तीक काडपाक वातावरण निर्मिती करतात, असो दावो केल्लो, पूण काल वेगळेंच घडलें. आरजीक फाटले वेंचणुकेंत 9.81 टक्के मतां मेळिल्लीं. गोंयकारांक नोकरे, धंद्यांत प्राधान्य मेळचें, भुमिपुतांक हक्क मेळचे, भायल्यांचें प्रस्थ उणें जावचें, 39 ए रद्द जावचें ह्यो आरजीच्यो मागण्यो अजून आसात. फुडारी सोडून गेले तरी तें धोरण कायम उरतलें! फुडाऱ्यांनी (आनी पक्षानूय!) वैयक्तीक म्हत्वाकांक्षा कुशीक दवरून युती करीत जाल्यार मतांची टक्केवारी वाडूं येता, पूण मोह वाडटा, पक्षा परस व्यक्ती व्हडली जाता, तेन्ना पोंदचें कदेल केन्ना नाच्च जाता, तेंय कळना. सगलेच मंत्री, मुख्यमंत्री जावपाक सोदपाक लागले काय जिखून आयिल्ल्या पक्षाचें कितें जाता, तें गोंयकारांनी पळयलां.
आरजीपींत जाल्ल्या ह्या दशावतारी नाटकाक खुद्द तेच जापसालदार आसात, काय हाचे फाटल्यान कोण शकुनीमामा बी आसा, ताची उमळशीक राजकारण मोगींक लागल्या आसतली. गोंयची अस्मिताय, सैम, जमीन अशे मुद्दे घेवन लढपी तळागाळांत तरणाट्यांच्या ह्या पक्षाक खांवटे पडलें, ताचें बऱ्याच जाणांक वायट दिसलां, हें मात न्हयकारपाक मेळचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
