भांगरभूंय | प्रतिनिधी
इंडियन प्रिमियर लिगेचे (आयपीएल) 66वे मॅचींत गुजरात टायटन्सान आदलो पांच खेपेचो वस्ताद चेन्नय सुपरकिंग्साक 89 धांवड्यांनी हारायलो. हे हारीक लागून चेन्नय सुपर किंग्साचें प्लेऑफांत पावपाचें आव्हान सोंपलें.
दुसरे वटेन गुजरातान गुणतकट्यांतली आपली दुसरी सुवात घटमूट केली. ह्या जैतान ताचे 14 मॅचींतल्यान 18 गूण जाल्यात. गुजरातान चेन्नय पंगडाक जैता खातीर 230 धांवड्यांची मोख दिल्ली. ताचो फाटलाव करतना चेन्नयचो डाव 13.4 ओव्हरींनी फक्त 140 धांवड्यांचेर सोंपलो.
ताच्या एकाय बॅट्समनाक व्हड खेळी करपाक जमली ना. गुजराता वतीन मोहम्मद सिराज, कगिसो रबाडा आनी रशीद खान हाणें 3-3 विकेटी घेतल्यो.
ते आदीं गुजरात टायटन्सान आपल्या पोरण्या आनी येसस्वी फॉर्माचो प्रत्यय हाडलो. पयल्या तीन बॅट्समनांच्या नेटार तांणी धांवड्यांचो दोंगर उबारलो.
साई सुदर्शनान सगल्यांत चड 84 धांवड्यांची खेळी केली, जाल्यार शुभमन गिलान 64 धांवड्यो आनी जोस बटलरान नाबाद 57 धांवड्यो केल्यो. सुरुवातीक शुभमन गिलान आक्रमक भुमिका घेतली, जाल्यार सुदर्शनान ताका बरी साथ दिली. पॉवरप्ले सोंपल्या उपरांत मात दोनूय बॅट्समनांनी खेळपट्टीचेर आपलो ताबो मेळयलो आनी चवक्यांचो सक्यांचो पावस घालो.
गिलान फक्त 23 बॉलांनी अर्द शेंकडो पूर्ण केलो. तशेंच ताणें टी-20 क्रिकेटींत स हजारांचो टप्पो लेगीत हुपलो. ताच्या फाटोफाट सुदर्शनान लेगीत 35 बॉलांनी अर्द शेंकडो पूर्ण केलो. दोगांयनी पयले विकेटी खातीर 125 धांवड्यांची भागिदारी केली.
13वे ओव्हरींत जॉन्सनाचे बॉलिंगेचेर गिल मिड-विकेट वाठारांत कॅच दिवन परतलो. ते उपरांत मैदानांत आयिल्ल्या बटलरान आक्रमक बॅटींग केली. 18वे ओव्हरींत सुदर्शन कंबोजाच्या बॉलाचेर सक मारपाच्या यत्नांत बाद जालो. ताच्या फाटोफाट राहुल तेवतिया शुन्याचेर धांवबाद जालो.
ते उपरांत बटलरान फक्त 23 बॉलांनी अर्द शेंकडो पूर्ण केलो. ताका साथ दिवपाक आयिल्ल्या वॉशिंग्टन सुंदरान मुकेश चौधरीच्या बॉलाचेर थर्ड मॅना वयल्यान सको मारलो. अखेरच्या बॉलाचेर ऊर्विल पटेलाक कॅच दिवन सुंदर बाद जालो. ते मेरेन गुजरातान 220 चो आंकडो हुपिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
