व्यक्ती केंद्रीत राजकारणा मुखार हारलों

भांगरभूंय | प्रतिनिधी

मनोज परब हांचो राजकारणाक आदेवश

आरजीपीच्या अध्यक्ष, संस्थापक वांगडी पदाचो राजिनामो

पक्षांत सत्तेक लागून मोह सुरू जाल्ल्याचें रजांव

भांगरभूंय । प्रतिनिधी

पणजी : रेह्व्युलेशनरी गोवन्स पक्षाचे (आरजीपी) एक पर्व सोंपलें. पक्षाचे सुप्रिमो मनोज परब हांणी राजकारणांतल्यान संन्यास घेवपाचें जाहीर करून पक्षाच्या अध्यक्षपदा सयत संस्थापक वांगडी म्हूण राजिनामो दिवपाची घोशणा केली. 2022 उपरांत रेव्ह्युलेशन राजकी मार्गार फुडें सरलें आनी पक्षांत सत्तेक लागून मोह सुरू जालो, अशें रजांव परब हांणी दिलें. गोंयकारां खातीर लडपाच्या सपनांतल्यान एक क्रांती सुरू केल्ली. आयज ती क्रांती हळशीक राजकारणांत बदल्ल्या. व्यक्ती केंद्रीत सत्तेच्या राजकारणा मेरेनच्या ह्या प्रवासांत हांव पुराय हारलां. गोंयां खातीर निर्भयपणान लडपी फुडारपण तयार करपा खातीर हांवें म्हजें वतीन बऱ्यांतले बरे यत्न केलें, अशेंय तांणी सांगलें.

मजगतीं, मनोज परब हांचो राजिनामो हो एक ड्रामा वा प्रॅंक न्हय. आरजीपीचे कार्यकारिणी समितीन तांचो राजिनामो स्विकारला आनी परब हे खंयचेच समिती भितर नात. पूण आतां आयजीपीचो एकूय वांगडी राजिनामो दिवपाचो ना. आमी पक्ष फुडें व्हरपाक तत्पर आसात, अशें आरजीपीचे भांडारी अजय खोलकार हांणी म्हणलां.

पणजेच्या पक्षाच्या मुख्यालयांत आपयिल्ले पत्रकार परिशदेंत परब हांणी आपलो निर्णय जाहीर केलो. ह्या वेळार पक्षाचे सरचिटणीस विश्वेस नायक आनी भांडारी अजय खोलकार हाजीर आशिल्ले. हो निर्णय जाहीर करतना मनोज परब खूब भावूक जाले.

2017 त आरजी शुध्द स्वरुपांत सुरू जाली आनी कसलीच राजकी फाटभूंय नासतना 2022 त विधानसभा वेंचणूक लडोवन 10 टक्के मतां मेळयलीं आनी एक आमदार वेंचून हाडलो, अशें परब हांणी सांगलें.

उपरांत आमची काम करपाची पद्दत बदलून राजकी प्रक्रिया सुरू करची अश्यो खूबशो सुचोवण्यो आनी सल्ले पक्षाक आयले. त्या वेळार आमचे रेव्ह्युलेशन हें राजकी मार्गार चालीक लागलां हाची जाणविकाय आमकां येवंक नाशिल्ली. राजकी मार्ग आपणायिल्ल्यान पक्षा भितर अंतर्गत राजकारण सुरू जालें जाची आमी कल्पना लेगीत करूंक नाशिल्ली आनी सत्ते खातीर मोह तयार जावपाक लागलो, असो आरोप परब हांणी केलो.

उपरांत व्यक्तीगत राजकारण सुरू जालें. आमी सुरू केल्ले हे क्रांती आड आमच्याच भुरग्यांनी मडगांवां बसका घेवन कारस्थानां सुरू केलीं. ही गजाल खूब दुख्ख दिवपी आशिल्ली. भायले न्हय जाल्यार आमच्या पक्षांच्या वांगड्यांनी पक्षाचें फुडारपण आनी कार्यकारणी समिती बदलपा खातीर न्यायालयांत वचून पक्ष ताब्यांत घेवपाचो निर्णय घेतलो, असो दावो परब हांणी केलो.

फाटलीं तीन वर्सां जालीं हांव ह्यो गजाली भितरले भितर सोंसतालों. भावनेंत व्हांवून हांवें त्या वेळार ख्यास्तीचे निर्णय घेवंक नात. पूण हें कोंफुसांव पक्षाचे कार्यकारी समिती मेरेन पावलें आनी पक्षांत पडपी फुटीचेर नियंत्रण मेळोवपाक शक्य जावंक ना. हांवें हो पक्ष एका हेतान सुरू केल्लो, हांयेसा खातीर न्हय. पूण अध्यक्ष ह्या नात्यान ह्या गजालींचेर नियंत्रण मेळोवपाक हांव अपेसी थारिल्ल्यान पक्षाची ही गत जाल्या, अशी खंत परब हांणी उक्तायली.

इतलीं वर्सां म्हजे खातीर तुमी जी प्रार्थना केल्या, बेसांव भेटयलां, म्हजें बरें मागलां त्या सगल्यांचें हांव उपकार मानतां. ह्या खिणा सावन हांव पक्षाचो अध्यक्ष, संस्थापक वांगडी म्हूण राजिनामो दितां आनी सक्रीय राजकारणांतल्यान संन्यास घेतां, अशी घोशणा परब हांणी केली.

‘मन मारून जगपाक शकना’

2022 मेरेन म्हाका कसलेच फिल्टर नाशिल्ले. उपरांत परंपरीक राजकारणाचें रूप दिवपाचो यत्न जावन अध्यक्ष ह्या नात्यान कशें उलोवचे हाचे म्हाका सल्ले येवपाक लागले. पूण म्हजी आक्रमकता मतदार वा गोंयकारां आड नाशिल्ली, ती यंत्रणेक प्रस्न करपा खातीर आशिल्ली. पूण म्हजें मन मारून हांव जगपाक शकना. हांवें रेव्ह्युलेशनाची खूब ख्यास्त भोगली आनी 2022 मेरेनचो काळ म्हजे जिणेंतलो बरो भाग आशिल्लो अशें मनोज परब हांणी सांगलें.

नो कमेंट्स : मुख्यमंत्री

आरजी पक्षाचे मुखेली मनोज परब हांच्या राजिनाम्या उपरांत प्रतिक्रिया दिवपाक मुख्यमंत्री डॉ. प्रमोद सावंत हांणी न्हयकार दिलो. नो कमेंट्स इतलेंच तांणी सांगलें.