चेडूं दिना म्हूण खून

भांगरभूंय | प्रतिनिधी

दुबावीत खुनी 24 वरां भितर ताब्यांत

भांगरभूंय । प्रतिनिधी

दिवलच : कुडणें सांखळे जाल्ल्या बायलेच्या खून प्रकरणाचो तपास लावन दिवचल पुलिसांनी फकत 24 वरां भितर फरारी दुबाविताक अटक करपाक येस मेळयलें. पुलिसांनी दिल्ले म्हायती प्रमाण मरण आयिल्ले बायलेच्या धाकट्या चेडवा कडेन दुबावीत लग्न करपाक सोदतालो. ताचो हो प्रस्ताव बायलेन न्हयकारलो. चेडूं दिना म्हूण रागांतल्यान हो खून केल्ल्याचें मुखार आयलां.

19 मे 2026 ह्या दिसा दनपारां सुमार 3.27 वरांच्या सुमाराक कुडणें सांखळेच्या चिकणें वाठारांत एके बायलेचेर हल्लो जाल्ल्याची म्हायती दिवचल पुलीस स्टेशनाक मेळ्ळी. पुलीस ताकतिकेन घडणुकेचे सुवातेर पावले तेन्ना तांकां शैला संजय घाडी (58. रा. चिकणें- कुडणें) आपल्या घरांत मरण आयिल्ले अवस्थेंत दिसली.

मरण आयिल्ले बायलेचो चेडो शुभम संजय घाडी हाचे कडेन मुळावी चवकशी केली तेन्ना ताणें, सागर रमेश रावळ (34. रा. मलईवाडी, शिरशिंगे, सावंतवाडी, महाराष्ट्र) हाणें घरांत जबरदस्तीन घुसून खून केल्ल्याचो आरोप केला.

घडणूक घडले उपरांत दुबावीत घरांतली भांगराची सरपळी आनी मरण आयिल्ले बायलेचो नोकिया मोबायल फोन घेवन पळून गेलो. इतलेंच न्हय जाल्यार, दुबावितान मरण आयिल्ले बायलेच्या व्हडल्या चेडवाक फोन करून खून केल्ल्याची कबुली दिली आनी तिका तशेंच तिच्या घरच्यांक जिवेशी मारपाची धमकी लेगीत दिल्ल्याचें पुलीस तपासांत उक्तें जालां.

ह्या प्रकरणांत शुभम संजय घाडी हाचे कागाळे वयल्यान दिवचल पुलिसांनी गुन्यांव नं. 64/2006 नोंद करून भारतीय न्याय संहिता (बीएनएस) 2003 खाला कलम 332 (अ), 103, 309 (4) आनी 351 (3) खाला गुन्यांव दाखल केलो.

पुलीस निरिक्षक विजय व्ही. राणे सरदेसाय हांच्या फुडारपणा खाला विशेश तपास पंगड स्थापन केले. पीएसआय विराज धावसकार आनी पीएसआय आकाश परवार हांच्या फुडारपणा खाला पंगडांनी सावंतवाडी, कोल्हापूर आनी मुंबय वाठारेंत सोद मोहीम चलयली. तांत्रीक तपास, मोबायल लोकेशन आनी महाराष्ट्रांतल्या मीरा- भाईंदर, वसय- विरार पुलीस आयुक्तालयाच्या क्रायम ब्रांच युनीट- 4 हांचे मजतीन दुबाविताचो माग काडलो. दुबावीत ठाणे वाठारांत आशिल्ल्याची म्हायती पुलिसांक मेळ्ळी. दिवचल पुलीस, मपाराष्ट्र क्रायम ब्रांच आनी थळाव्या खबऱ्यांचे मजतीन संयुक्त कारवाय करून दुबावीत सागर रमेश रावळ हाका 2- मे ह्या दिसा ठाणे जिल्ह्यांतल्या चेना ब्रिजा कडल्या द्वारका हॉटेल वाठारांतल्यान ताब्यांत घेतलो. ते परांत काशिगांव पुलीस स्टेशनांत सांगेच्या 5.30 वरांच्या सुमाराक ताका अधिकृत अटक केली. दुबाविताक 21 मेक मीरा- भाईंदर, ठाणेच्या न्यायालयांत हाजीर करून ट्रान्झीट रिमांड घेतलो.

कायदेशीर प्रक्रिया पुराय जाले उपरांत दुबाविताक फुडल्या तपासा खातीर गोंयांत हाडटले, अशी म्हायती पुलिसांनी दिल्या.

ही पुराय कारवाय उपाधिक्षक दिवचल श्रीदेवी बी. व्ही. हांच्या मार्गदर्शना खाला तशेंच उत्तर गोंयचे अधिक्षक हरिष माड मडकयकार हांचे देखरेखी खाला जाली. ह्या प्रकरणाचो फुडलो तपास पुलीस निरिक्षक विजय व्ही. राणे सरदेसाय करतात.