भांगरभूंय | प्रतिनिधी
पक्षाचे अध्यक्ष आनी संस्थापक वांगडी पदावेल्यान राजीनामो
भांगरभूंय । प्रतिनिधी
पणजीः रेह्व्युलेशनरी गोवन्स पक्षाचे (आरजीपी) एक पर्व सोंपले. पक्षाचे सुप्रीमो मनोज परब हांणी राजकारणांतल्या सन्यास घेवपाचे जाहीर करून पक्षाचे अध्यक्ष पदा सयत संस्थापक वांगडी म्हूण राजीनमो दिवपाची घोशणा केली. 2022 उपरांत रेव्ह्युलेशन राजकी मार्गार फुडें सरले आनी पक्षांत सत्तेक लागून मोह सुरू जालो, अशें रजाव परब हांणी दिले. मजगतीं, परब हांचो राजिनामो पक्षाकडे अजून येवंक ना अशें पक्षाचे भांडारी अजय खोलकार हांणी सांगलें.
पणजेच्या पक्षाच्या मुख्यालयांत आपयल्ले पत्रकार परिशदेत परब हांणी आपलो निर्णय जाहीर केलो. ह्या वेळार पक्षाचे सरचिटणीस विश्वेस नायक आनी भांडारी अजय खोलकार हाजीर आशिल्ले. हो निर्णय जाहीर करतना मनोज परब खूब भावूक जाले.
वर्स 2017त आरजी शुध्द स्वरुपात सुरू जाली आनी कसलीच राजकी फाटभूंय नासतना वर्स 2022त विधानसभा वेंचणूक लढोवन 10 टक्के मतां मेळयली आनी एक आमदार वेंचून हाडलो, अशें परब हांणी सांगलें.
उपरांत आमची काम करपाची पध्दत बदलून राजकी प्रक्रीया सुरू करची अश्यो खुबशो सुचोवण्यो आनी सल्ले पक्षाक आयलें. पूण त्या वेळार आमचे रेव्ह्युलेशन हे राजकी मार्गार चालीक लागला हाची जाणवीकाय आमका येवंक ना. राजकी मार्ग आपणायिल्ल्यान पक्षा भितर अंतर्गत राजकारण सुरू जाले जाची आमी कल्पना लेगीत करूंक नासली आनी सत्ते खातीर मोह तयार जावपाक लागलो, असो आरोप परब हांणी केलो.
उपरांत व्यक्तीगत राजकारण सुरू जाले. आमी सुरू केल्ल्या ह्या क्रांती आड आमच्याच भुरग्यांनी मडगांवां बसका घेवन शडयंत्रा सुरू केली. ही गजाल खूब दुख दिवपी आशिल्ले. भायले न्ही तर आमचे पक्षांच्या वांगड्यांनी पक्षाचे फुडारपण आनी कार्यकारणी समिती बदलपा खातीर न्यायालयांत वचून पक्ष ताब्यांत घेवपाचो निर्णय घेतलो, असो दावो परब हांणी केलो.
फाटली तीन वर्सा जाली हांव ह्यो गजाली भितरले भितर सोंसातलो. पूण भावनेत व्हावूंन हांवेन त्या वेळार ख्यास्तीचे निर्णय घेवंक ना. पूण हे कोफुसांव पक्षाचे कार्यकारी समिती मेरेन पावले आनी पक्षांत पडीपी फुटीचेर नियंत्रण मेळोवपाक शक्य जावंक ना. हांवेन हो पक्ष एका हेतान सुरू केल्लो, हायेसा खातीर न्हय. पूण अध्यक्ष ह्या नात्यान ह्या गजालींचेर नियंत्रण मेळोवपाक हांव अपेसी थारिल्ल्यान पक्षाची ही गत जावन रावल्या, अशी खंत परब हांणी उक्तायली.
देखून इतले वर्सा म्हजे खातीर तुमी जी प्रार्थना केल्या, बेसाव भेटयल्यांत, म्हजें बरें मागल्यांत त्या सगळ्यांचे हांव उपकार मानता. ह्या खीणा सावन हांव पक्षाचो अध्यक्ष, संस्थापक वांगडी म्हूण राजीनामो दिता आनी सक्रीय राजकारणांतल्यान सन्यास घेता, अशी घोशणा परब हांणी केली.
मनोज परब हांचो राजीनामो अजून पक्षाकडेन येवंक ना. तांणी घेतिल्ल्या निर्णया विशीं आमी बसकेंत चर्चा करतले. आमका मनोज हे अध्यक्ष उरिल्ले जाय. आयज सांज मेरेन पक्ष आपलो निर्णय कळींत करतले, अशें आरजीपीचे भांडारी अजय खोलकार हांणी सांगलें.
2022 मेरेन म्हाका कसलेच फिल्टर नासले. उपरांत परंपरीक राजकारणाचे रुप दिवपाचे यत्न जावन अध्यक्ष ह्या नात्यान कसे उलोवचे म्हूण म्हाका सल्ले येवपाक लागले. पूण म्हजी आक्रमकता मतदार वा गोंयकारां आड नासली ती यंत्रणेक प्रश्न करपा खातीर आसली. पूण म्हजें मन मारून हांव जगपाक शकना. हांवें रेव्ह्युलेशनाची खूब ख्यास्त भोगली आनी 2022 मेरेनचो काळ म्हजे जिणेंतलो बरो भाग आसलो अशें मनोज परब हांणी सांगलें.
फेब्रुवारी 2016: आम आदमी पार्टी वांगडा राजकारणांत प्रवेश
मनोज परबान 2017चे गोंय विधानसभेच्या वेंचणुके आदीं आम आदमी पार्टींत भितर सरून आपल्या राजकीय प्रवासाक सुरवात केल्ली. पूण आपच्या तिकेटीचेर तांचेनी वेंचणूक लढोवंक नासली.
मार्च 2017: ‘रेव्ह्युलेशनरी गोवन्सची थापणूक
उपरांत मनोज परब आप पक्षांतल्यांन भायर सरले आनी तांणी 7 संस्थापक वांगड्या बरोबर मेळून, आमदार विरेश बोरकार सयत बिगर-सरकारी संघटना रेव्ह्युलेशनरी गोवन्सची थापणूक केली. हे संघटनेन पर्सन ऑफ गोवन ओरीजीन (पोगो) कायद्याच्या संकल्पनेक नेटान उर्बा दिली.
नोव्हेंबर 2021: नोंदणीकृत राजकीय पक्षांत पावल
वेंचणुकेच्या राजकारणांत थेट वांटो घेवपाची गरज वळखून, ह्या चळवळीन अधिकृत रितीन ”रेव्ह्युलेशनरी गोवन्स पार्टी’ची (आरजीपी) थापणूक केली. जानेवारी 2022 मेरेन भारतीय वेंचणूक आयोगान तांकां एक राजकीय पक्ष म्हणून मान्यताय दिली.
फेब्रुवारी 2022: मनोज मुख्यमंत्रीपदाचे उमेदवार
2022 च्या गोंय विधानसभा वेंचणुके खातीर आरजीपी वतीन मनोज परब हांकां मुख्यमंत्रीपदाचे उमेदवार म्हणून जाहीर केले. तांणी थिवे आनी वाळपय अशा दोन मतदारसंघांतल्यान वेंचणूक लढयली. जरी ते स्वता वेंचून आयले नासले, तरी आरजीपीन 38 मतदारसंघात वेंचणूक लढोवन 9.81% इतली मताची टक्केवारी मेळयली आनी सांत आंद्रे मतदारसंघांतल्यान विरेश बोरकरांच्या रुपान आपली पयली सुवात जिखली.
जून 2024: लोकसभा वेंचणूक आनी राजकारणांतल्यान विसव
18व्या लोकसभा वेंचणुके खातीर परब हांणी उत्तर गोंय मतदारसंघातल्यान पक्षाच्या तिकेटीचेर उबे राविल्ले. जून 2024त वेंचणुकेचो निकाल फावो तसो तांचे फावरांत लागूंक नाशिल्ले कारणान परब हांणी लोकांचो कौल आनी मर्म जाणून घेवपा खातीर सक्रीय राजकारणांतल्यान 7 म्हयन्यांचो विसव घेतिल्लो.
जानेवारी 2025: परतून सक्रीय राजकारणांत
विसव घेतिल्ले परब परते सक्रीय राजकारणांत आयले आनी ह्या काळांत सुमार 30 मतदारसंघांतल्या लोकांच्या भावनांचो अभ्यास केल्ल्याचें तांणी सांगलें. 2027च्या गोंय विधानसभा वेंचणुके खातीर कांय थराविक मतदारसंघांचेर लक्ष केंद्रीत करपाची घोशणा तांणी केली. उपरांत, डिसेंबर 2025त जाल्ले झेडपी वेंचणुकेत परब हांचे फुडारपणा खाला आरजीपीन आपली कामगिरी सुदारयली. आरजीपीन सांताक्रुज आनी सेंट लोरेन्स हे दोन मतदारसंघ जिखले. तशेंच खुबशे मतदारसंघानी भाजपाक नेटाची टक्कर दिली.
मे 2026ः राजकारणांतल्या एक्जिट
फाटले म्हयनो मायज जालो आरजीपी भितर अंतर्गत कोफुसांव बरेच शिजताले. परब हांचे पासीयेस काबार जाले उपरांत तांणी सोशल मिडीयाचेर बरोच उद्रेक केल्लो. हे कोफुसांव भौशिक जाले उपरांत मनोज परब-विरेश बोरकार अशें दोन गट जावन दरी वाडली. पक्ष समेटीकरण करपाच्या यत्नाक अपेस फावो जाले उपरांत परब हांणी बिरेस्तार, 21 मेक राजकारणांतल्या सन्यास घेवपाची घोशणा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
