भांगरभूंय | प्रतिनिधी
नुवें मतदारसंघांतल्यान आपली बायल व्हिओला पाशेको लढटली
मडगांव: येवपी वेंचणूक बाणावली मतदारसंघांतल्यान आपूण स्वता, जाल्यार नुवें मतदारसंघांतल्यान आपली बायल व्हिओला पाशेको लढटली, अशें आदले मंत्री मिकी पाशेको हांणी स्पश्ट केलें. तशेंच, कॉंग्रेस पक्षांत पयशांच्या बदला तिकिटांची विक्री जाता, हाका लागून कॉंग्रेसीने उमेदवारी दिल्यार आपूण ती घेवचो ना, असोय आरोप तांणी केलो.
आदले मंत्री मिकी पाशेको हांणी बिरेस्तारा घेतिल्ले पत्रकार परिशदेंत उलयतना सांगलें, बाणावले मतदारसंघांतल्यान ह्यान पयलीं आपूण तीन फावटीं वेंचून आयलां. हे फावटींय थंयच्यानूच वेंचणूक लढटलों. तशेंच, नुवें मतदारसंघांतल्यान बायल व्हिओला पाशेकोय वेंचणूक लढटली. ही वेंचणूक नेमकी खंयच्या पक्षा कडल्या लढटले, हाचो आजून निर्णय जावंक ना. तें एक ’सरप्रायज’ आसतलें, अशें तांणी नमूद केलें. कॉंग्रेस पक्ष आतां पुरायेन कॉम्प्रमायज करपी पक्ष जाला. तांकां वेंचणुकेच्या तयारे खातीर तीन म्हयन्यां पयलींच वेळ दिल्लो, तशेंच वेंचणुकेचो खर्चूय आपूणच करतलों, अशें सांगिल्लें. मात तांणी हाची कसलीच दखल घेवंक ना. ज्या दिसा आपूण भायर सरतलों, त्या दिसा आपली संघटणा कॉंग्रेस परस व्हड आशिल्ल्याचें दिसून येतलें, असो विस्वास तांणी उक्तायलो. २०१२त कॉंग्रेस नाका म्हणून सगल्यांनीच फाटबळ दिल्ल्यान आपणेंय भाजपाक फाटबळ दिल्लें. केन्ना तरी दर्या समान आशिल्लो कॉंग्रेस पक्ष तळ्या इतलोच उरला. उरिल्लेय फुडारी कॉंग्रेस सोपयिल्ल्यान ताची भाजपा कडेन ओड आसा, अशी टिका तांणी केली.
खुबश्या राजकीय पक्षांनी आपल्या कडेन संपर्क केल्ल्यान योग्य वेळार खंयच्या पक्षांतल्यान लढचें, हाचो निर्णय घेतले. कॉंग्रेसींत विशिश्ट लोकांची लॉबी आशिल्लयन हो पक्ष फकत पयशेकारांकूच लागीं करता. वेंचणुको लागीं पावल्यो काय कॉंग्रेस करोडांनी रुपया घेवन, समाजीक कार्य नाशिल्ल्यांक उमेदवारी दिता. ह्या वेळारूय तेंच घडटलें. तमिळनाडूंत फाटले फावटीं कॉंग्रेसी कडेन ११ सुवातो आशिल्ल्यो. त्यो आतां ह्याच कारणाक लागून ५ सुवातांचेर आसात. पयशांच्या नेटार उमेदवारी मेळोवपी लोक फुडाराक पयशे घेवनूच दुसर्या पक्षांत वतले, अशें तांणी सांगलें. आपले पुराय राजकीय कारकिर्दींत आपणें केन्नाच भ्रश्टाचार करूंक ना, हें कोणेंय सिद्ध करून दाखयलें जाल्यार आमी राजकारण सोडटले, अशें आवाहन पाशेको हांणी निमाणे कडेन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
