भांगरभूंय | प्रतिनिधी
पणजी : आदले प्रधानमंत्री राजीव गांधी हांणी गोंयां खातीर दिल्लें योगदान म्हत्वाचें आसा. तांणी कोंकणी भाशेक अधिकृत भाशेची सुवात दिल्या. तांणीच गोंयचे उदरगती खातीर घटकराज्याचो दर्जो दिलो. तांचें योगदान गोंयकारांनी केन्नाच विसरचें न्हय, असो उलो कॉंग्रेस प्रदेशाध्यक्ष अमित पाटकार हांणी मारलो. पणजी राजीव गांधींच्या ३५वे पुण्यतिथी निमतान आयोजीत आयोजीत कार्यावळींत ते उलयताले. ह्या वेळार फ्रान्सिस सार्दिन, एम के शेख , अमरनाथ पणजीकर आनी हेर पदाधिकारी हाजीर आशिल्ले.
पाटकार हांणी सांगलें, राजीव गांधी हांणी देशांत आयटी क्रांती घडोवन हाडली. हाका लागून देशांत तंत्रज्ञान क्षेत्रांत व्हड उदरगत जाली. तांणी चडांत चड तरणाट्यांक मतदानाचे प्रक्रियेंत वाटेकार करून घेवपा खातीर यत्न केले. तांच्या काळांत मतदानाचो अधिकार २१ वेल्यान १८ वर्सां केलो. ते एक आदर्श आनी शिक्षीत प्रधानमंत्री आशिल्ले. आयज देशाकडेन कसलेच तरेचें अर्थीक धोरण ना. परिस्थितीचेर कितेंय उपाय काडपाचें सोडून आयज प्रधानमंत्री लोकांक भांगर घेवनाकात, इंधन वाटयात अशे सल्ले दिता.
गोंयच्या भाजप सरकारान फाटलीं १४ वर्सां पर्यावरणाची नासाडी केल्या. दरेका गोंयकारान राजीव गांधी हांचो उदरगतीचो विचार आत्मसात करप गरजेचें. आयज राजीव गांधी हांचे पूत राहुल गांधी असो यत्न करतात.
असल्या फुडार्यांक आमी सगल्यांनी फाटबळ दिवपाक जाय. हाका लागून येवपी वेंचणुकेंत गोंयचे जनतेन कॉंग्रेसीक वेंचून हाडची. अशें केल्यारूच गोंयाक वाटोवपाक मेळटलें, अशें पाटकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
