भांगरभूंय | प्रतिनिधी
केपें : ऑनलायन गुंतवणुकीचेर भरपूर परताव्याचें हांयस दाखोवन केपेंच्या एका मनशाची वट्ट १ लाख रुपयां परस चड रकमेची सायबर फटवणूक जाल्ल्याचें उक्तें जालां. ह्या प्रकरणांत केपें पुलिसांनी अनवळख्यां आड गुन्यांव नोंद केला.
केपें पुलिसांनी दिल्ले म्हायती प्रमाण, फिर्यादी प्रदीप जाधव (रा. कट्टा-अमोणा, केपें) हांणी दिल्ले कागाळींत म्हणलें, ५ मे २०२६ दिसा एके बायलेन संपर्क करून स्वताची वळख शिवानी अशी करून दिली. तिणें ‘लेमॉन’ नांवाच्या अॅपांत गुंतवणूक केल्यार व्हड फायदो जातलो, अशें सांगून कागाळदाराक विस्वासांत घेतले.
दुबावीत बायलेन कागाळदाराक ‘लेमॉन’ नांवाचें ऍप डावनलोक करपाक सांगलें. ताची एपीके फायल मोबायलांत इन्स्टॉल करपाक सांगलें. ताचे उपरांत मोबायलावेली ‘एक्सेसिबिलिटी परमिशन’ सुरू करपाक लावन दुबावितान कागाळदाराच्या मोबायलाचेर अनधिकृत प्रवेश मेळयलो.
उपरांत सेन्सेक्स ७३०००त व्हड फायदो जातलो, अशें हांयस दाखोवन कागाळदारा कडल्यान १ लाख ४६ रुपये गुंतवून घेतलें. मात, ही रक्कम कागाळदाराचे संमती शिवाय तांच्या लेमॉन खात्यांतल्यान विवीध बँक खात्यांनी वळयली. ह्या प्रकाराक लागून प्रदीप जाधव हांची वट्ट १,००,०४६ रुपयांची फटवणूक जाल्या. अनवळखी आरोपी आड सायबर फटवणुकेचो गुन्यांव नोंद केला. ह्या प्रकरणाचो फुडलो तपास पीएसआय दीपा देईकार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
