भांगरभूंय | प्रतिनिधी
नवी दिल्ली: देशभरांत खवदळ घालपी नीट-यूजी परिक्षेच्या प्रस्नपत्रिकेच्या फुटीचो परिणाम आतां राज्यांतल्या हेर अभ्यासक्रमांच्या प्रवेश प्रक्रियेचेर जावपाक लागला. ३ मे २०२६ दिसा जाल्ली आनी २२ लाखां परस चड विद्यार्थ्यांनी दिल्ली नीट-यूजी २०२६ परिक्षा राष्ट्रीय चांचणी एजन्सी कडल्यान रद्द केल्या. ह्या निर्णयाक लागून राज्यांतल्या अभियांत्रिकी आनी फार्मसी अभ्यासक्रमांचें प्रवेश वेळापत्रक पुरायपणान हालतलें असो भंय निर्माण जाला.
ऑल इंडिया कोटा प्रवेश
राज्यांतल्या कांय विशिश्ट अभियांत्रिकी अभ्यासक्रमांत प्रवेश मेळोवपा खातीर NEET परिक्षेचे गूण आनी बी.फार्मसीचो १५ टक्के ऑल इंडिया कोटा स्विकारतात. अखिल भारतीय कोटांत प्रवेश प्रक्रिया पुरायपणान नीट गूणांचेर आदारीत आशिल्ल्यान हे परिक्षेचो निकाल जाहीर जाय मेरेन राज्य सादारण प्रवेश चांचणी कक्ष (सीईटी सेल) आपली फुडली प्रक्रिया सुरू करूंक शकचो ना. ताका लागून सध्या सीईटी सेलाची पुराय प्रवेश प्रक्रियेक सध्या आडमेळें आयलां.
प्रक्रियेक लागतलो ब्रेक
आतां ‘नीट’ची परत परिक्षा २१ जून दिसा जातली, हे परिक्षेच्या निकाला खातीर आनीक २० ते २५ दीस लागपाची शक्यताय आसा. म्हणल्यार नीटाचो निकाल जुलयाच्या मध्याक वा जुलयाच्या निमाणे मेरेन मेळटलो. तो मेरेन राज्यांत अभियांत्रिकी आनी फार्मसीची प्रवेश प्रक्रिया सुरू जावंक शकची ना. हाका लागून चड करून जून-जुलय म्हयन्यांत सुरू जावपी प्रवेश प्रक्रिया अंदूं जुलय उपरांत सुरू जावंक शकता.
शिक्षणीक सत्र उसरां
प्रवेश प्रक्रियेंत कळाव जाल्ल्यान नव्या शिक्षणीक सत्राचेर सरळ परिणाम जातलो. म्हाविद्यालय उसरां सुरू जालें जाल्यार पयल्या वर्साच्या विद्यार्थ्यांचो अभ्यासक्रम वेळार पुराय करपाचें प्राध्यापक आनी म्हाविद्यालय प्रशासनाक व्हड आव्हान आसतलें. ह्या सेगीत परिक्षेच्या बोवाळाक लागून विद्यार्थ्यां मदीं आनी पालकांत खर तिडक आनी चिंतेचें वातावरण निर्माण जालां.
नीट पेपरफुटी प्रकरणांत आनीक एकल्याक अटक
नीट पेपर लीक प्रकरणांत आनीक एका आरोपीक पुण्यांतल्यान सीबीआयन अटक केल्या. अटक केल्लो आरोपी बालरोग तज्ञ आनी ताचें नांव डॉ. मनोज शिरुरे. मनोज शिरुरेचेर शिवराज मोतेगांवकारा कडल्यान स्वताच्या पुता खातीर कागदपत्रां विक्तीं घेतिल्ल्याचो आरोप आसा. नीट पेपर लीक प्रकरणांत सीबीआयन मनोज शिरुरे हांकां लातुरांतल्यान पुण्यांत चवकशी खातीर हाडिल्लो. हे चवकशे उपरांत मनोज शिरुरेक सीबीआयन अटक केली. डा.ॅ मनोज शिरुरे हो मुळांत लातूरचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
