भांगरभूंय | प्रतिनिधी
पणजीः फाटल्या तीन वर्सांत राज्यांत 70 इंटरकास्ट लग्नां जाल्यात. 2024 त 10 लग्नां, 2025 त 37 आनी 2026 त 23 लग्नांची नोंद जाल्या. इंटरकास्ट लग्न करपी जोडप्यांक सरकारा कडल्यान रु. 2.50 लाख मेळटा, अशी म्हायती केंद्रीय सामाजीक न्याय आनी सशक्तीकरण राज्य मंत्री रामदास आठवले हांणी दिली.
केंद्रीय मंत्री आठवले हे गोंय भोंवडेर आसात. हे फाटभूंयेर तांणी पर्वरी सचिवालयांत समाज कल्याण खात्याच्या अधिकाऱ्यांची भेट घेवन गोंयांत केंद्रीय येवजणेच्या अंमलबजावणेचो नियाळ घेतलो. बसके उपरांतची म्हायती दितना आठवले उलयताले.
2014 पयली खुबश्या लोकांची बँक खाती नाशिल्ली. पूण 2014 त मोदी सरकारा सत्तेत येतकच जनधन येवजण चालीक लावन गोंय राज्यात हे येवजणे खाला 2.32 लाख बँक खाती उक्ती जाली. वर्स 2015 त सामान्य लोकांक सुटसुटीत प्रक्रिये वरवीं 10 लाख मेरेन रीण दिवपा खातीर प्रधानमंत्री मुद्रा येवजण चालीक लायली. हे येवणजे खाला 4.15 लाख जाणांनी रीण घेतला, अशी म्हायती आठवले हांणी दिली.
वर्स 2016 त मोदी सरकारान गरीब-गरजू घराब्यांक गॅस जोडणी दिवपी उज्वला येवजण चालीक लायली आनी हे येवजणे खाला राज्यात फुकट 2 हजार गॅस जोडणी दिल्यात. तशेंच प्रधानमंत्री आवास येवजण- शार हे येवजणे खाला राज्यातल्या शार वाठारांतल्या 3 हजार जाणांक मजत जाल्या, अशें आठवले हांणी सांगलें.
2018 त सुरू जाल्ले आयुषमान भारत येवजणे खाला रु. 5 लाख मेरेन फुकट उपचार जातात. हे येवजणेचो आतां मेरेन 29 हजार गोंयकारांक फायदो जाला. तशेंच उज्वला येवजणे खाला गोंयकारांक 2.62 कोटी नग इतले फुकट एलईडी बल्बाचे वांटप जाला, अशें आठवले हांणी म्हणलें.
तशेंच वर्स 2011चे जनगणे प्रमाण गोंयांत 33 हजार दिव्यांगाची नोंद आसा. ह्या सगल्या दिव्यांग व्यक्तींक सरकारा कडल्यान रु. 11,868 इतले पेन्शन मेळटा. पूण ह्या दिव्यांगा खातीर राज्यांत सरकारी शाळा ना. राज्य सरकारान हे विशींचो प्रस्ताव केंद्रा कडेन मांडचो. आमी सरकाराक ही शाळा उबारपाक निश्चीत मजत करतले. ह्या शाळांनी आधुनीक शिक्षणा सयत वैजकी उपचाराच्यो सुविधा उपलब्ध आसतल्यो, अशें आठवले हांणी सांगलें.
———————-
एसटी आरक्षणाचेर करतले फाटपुरवणः आठवले
2011चे जनगणेने प्रमाण गोंयांत अनुसुचीत जमातीची संख्या 16.6 टक्के आनी अनुसुचीत जातींची संख्या 8.4 टक्के आसा. दोगांचीय संख्या मेळून 25 टक्के जाता देखून तांकां आरक्षण मेळपाक जाय. एसटी आरक्षणा खातीर राज्य सरकारान प्रस्ताव मंजूर केला. आरक्षण म्हणचे मंत्रालया कडेन संबंदीत नासले तरी हांव दिल्ली गेले उपरांत हाची फाटपुरवण करतलो. एसटी समुदायाक आरक्षण मेळल्यार आमकांय खोस जातली, अशें आठवले हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
