भांगरभूंय | प्रतिनिधी
फुडाराक सगल्यांनीच ऑनलायन विकपाच्या वेवसायांत देंवले बगर पर्याय उरचो ना.
अायचो काळ हायटॅक. सगलें आॅनलायन. कड्डण, कपडे, इलेक्ट्राॅनीक सामान, खाणां- जेवणां घरांत बसून मागोवपाक मेळटात. तें मागोवपीय वाडल्यात. बाजारांत मेळटा ताचे परस तांचें मोल इल्लें उणें आसता. कांय अॅपांचेर म्हाल परतून धाडपाक मेळटा. तांचेर वखदांय मागोवपी कांय लोक आसात. आॅनलायन वखद विक्री आनी झटपट डिलिव्हरी अॅप्सांच्या विरोधांत काल कांय राज्यांनी फार्मासी आनी केमिस्ट संघटणांनी राष्ट्रीय बंद पाळ्ळो. गोंयांतूय ताका प्रतिसाद मेळ्ळो. फक्त हाॅस्पिटलां लागसारच्यो आनी 24 वरां सेवा दिवपी फार्मासीच उक्त्यो आशिल्ल्यो. आॅनलायन अॅप्स येवचे पयलीं कपड्यांच्या दुकानदारांनी ‘सेलां’ आड आवाज काडिल्लो. मात तांचें कांय चलूंक ना. आयज आॅनलायन कपडे मागोवप इतलें वाडलां, की सेल बंद जाल्याच, पूण कपड्यांच्या दुकानांचेरूय संकश्ट आयलां. फुडाराक सगल्यांनीच आॅनलायन विकपाच्या वेवसायांत देंवले बगर पर्याय उरचो ना. निदान 2- 3 किलोमिटर अंतराचेर म्हाल स्वता घराघरांनी व्हरून दिवचो पडटलो. हें सुरू जालां, खास करून खाणांचे बाबतींत.
देशांत आॅनलायन वखदां विक्री वाडत आसा. डार्क वेबाचेर खाशेलें सर्च इंजीन वापरून लोकांनी ड्रग्स (घुंवळे वखदां) पसून मागयिल्ल्याच्यो घडणुको घडल्यात. कोविडा उपरांत सगल्याच मळांचेर बदल जाल्यात. जांव ती मागीर येरादारी, बाजार वा वखदांचो वेपार. लोक घरांत बसून वखदां मागोवपाक लागल्यात. मात हाका लागून कांय प्रस्नूय तयार जाल्यात. थळाव्या फार्मासींचेर परिणाम, दुयेंतींची सुरक्षा, बोगस वखदां आनी हेर जायते. खरें म्हणल्यार दोतोराच्या रेसैता बगर वखद घेवंक मेळना. पूण ताणें बरोवन दिल्लीं वखदां मुखार चालू दवरपाचीं आसात जाल्यार बरेच जाण तीं आॅनलायन मागयतात. ताचेर पूर्ण बंदी ना, पूण नेमांचे चवकटींत रावन विक्रेत्यांक तें करचें पडटा. सरकारी परवानो आशिल्ले, खात्रेचे कंपनीचींच वखदां घेवंक जाय, रेसैताची गरज आशिल्लीं वखदां तें आसले बगर घेवपाक जायना. न्हिदेचीं, मानसीक दुयेंसाचीं, अॅण्टीबायोटीक वखदां स्वताच्या मनान मागोवप धोक्याचें थारूं येता. चुकीचीं आनी बोगस वखदां मेळूं येतात. तातूंत आमचे कांय भाव सामके ‘प्रामाणीक’. ते वखदां बदला गुळगुळीत फातर पसून धाडटात.
गोंयांत पावला पावलार फार्मासी आसात. म्हणटकच दुर्मीळ वखदां सोडल्यार हेर आॅनलायन मागोवपाची तशी गरज ना. पणजेच्या दोतोरान दिल्लीं वखदां वाळपयचे फार्मासींत आनी फोंडेंच्या दोतोरान दिल्लीं वखदां काणकोणचे फार्मसींत मेळटाच अशें ना, मागीर धांवाधांव करची पडटा आनी आॅनलायन मागोवप जाता. तुमी खेडेंगांवांत रावतात, लागसार फार्मास ना, चड तेंप चलपी सादें दुयेंस आसल्यार दोतोरान दिल्लीं वखदां मागोवं येता. पूण रेसैत केन्नाचें तें पळोवप म्हत्वाचें. वखद बदल्लां वा ताचो डोस बदल्ला जाल्यार दोतोराचो सल्लो घेवप बरें. कामांत घुस्पल्ल्या लोकांक, जाण्ट्यांक, दुयेंतींक घरा मेरेन सवलतीच्या मोलांत वखदां मेळटात, हो फायदो. मात फार्मासकारांचें खूब लुकसाण जाता. गिरायकूच ना जाल्यार रोजगाराचे परिणाम जावं येता. कारण फार्मासींनी प्रशिक्षीत कर्मचारी आसतात. आॅनलायनाक लागून प्रामाणीक विक्रेते अडचणींत येतात. गांवगिऱ्या वाठारांतल्या फार्मासींक हाचो चड त्रास जाता. थंय उधारेचेर वखदां मेळटात. ही सवलत आॅनलायन अॅप्स दितातूच अशें ना. वखदां कशीं घेवपाचीं हें दुयेंतींक सांगपी फार्मासकार आसात.
आॅनलायन विकप्यांचेर सरकारी यंत्रणांची नदर जाय. गिरायका कडल्यान प्रिस्क्रिप्शनाचो फोटो मागोवप बंधनकारक करचें. फक्त परवानो आशिल्ल्यांकूच आॅनलायन विक्री करपाक दिवची. कांय थळाव्यो फार्मासी सदच्या गिरायकांक सवलत दितात, तांणी डिजिटल सेवा सुरू केल्यार बरी. भलायकी हो फक्त वेपाराचो विशय न्हय, तर लोकांच्या जिवा कडेन संबदीत असो मुद्दो, हें आॅनलायन विक्रेत्यांनी विसरूंक जायना. वखदांची बेकायदेशीर विक्री तर कोणेंच करची न्हय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
