फोरेन न्हय, डॅस्टिनेशन वॅडिंगा खातीर गोंयाक पसंतीः खंवटे

भांगरभूंय | प्रतिनिधी

अमेरिका-इराण झुजाक लागून खूबशे लागल्यात निर्बंध

पणजीः फोरेन टूर करचे परस देशा भितर भोंवात प्रधानमंत्री नरेंद्र मोदी हांणी मारिल्ल्या उल्याक गोंयाक नक्कीच फायदो जातलो. सद्या जे देशी पर्यटक आपली लग्नां देशा भायर करताले तांचे खातीर गोंय आनी जयपूर हे लग्न कार्यावळी खातीर आतां पसंतीचें थळ जावन रावलां. भारतीय हे गोंयाक पयले प्राधान्य दितात, अशें पर्यटन मंत्री रोहन खंवटे हांणी सांगलें.

माॅन्सून पर्यटना खातीरची तयारी थारावपा खातीर पर्यटन मंत्री रोहन खंवटे हांणी भागधारकांची बसका आपयिल्ली. हे बसके उपरांतची म्हायती दितना पर्यटन मंत्री उलयताले. ह्या वेळार पर्यटन खात्याचे संचालक केदार नायक, गोंय पर्यटन उदरगत म्हामंडळाचे वेवस्थापकी संचालक कुलदीप आरोलकार, टीटीएजीचे अध्यक्ष जॅक सुखीजा आनी हेर भागधारक हाजीर आशिल्ले.

पयलीं चडशे भारतीय डेस्टिनेशन वॅडींग म्हूण लग्नाच्यो कार्यावळी बेहरीन आनी दुबय करताले. पूण अमेरिका-इराण झुजाक लागून खूबशे निर्बंध लागल्यात. देखून लग्न कार्यावळी करपा खातीर ह्या पर्यटकांनी गोंयाची निवड केल्या. तशेंच मायस पर्यटन जशे की परिशद, इव्हेंट हे व्हड प्रमाणांत गोंयांत जावपाक लागल्यात. ह्या क्षेत्राक उर्बा दिवपा खातीर केंद्रान मायस ब्युरो स्थापन करपाक सांगलां. म्हयन्या भितर मायस ब्युरो चालीक लागतले, अशी म्हायती खंवटे हांणी दिली.

देशी पर्यटकांचो आंकडो हे खेपे वाडटलो. सद्या मिलेनियल आनी जेन-झी हे आयत्या वेळार आपली भोंवडी थारयतात आनी तांचो पयलो विचार म्हणटा तो गोंया वचपाचो जाता. विदेशी पर्यटनाचे बाबतीत फाटल्या वर्साचे तुळेन ह्या वर्सा पयल्या पांवड्यार 1.3 टक्के वाड नोंद जाल्ली. आतां दुसरो पांवडो चालीक लागला, अशें खंवटे हांणी सांगलें.

पावसाळी पर्यटन येता तेन्ना जंगल भोंवडी आनी घसघश्यांचेर निर्बंध येतात. देखून ह्यो गजाली जाग्यार घालपा खातीर पर्यटन खात्याचे संचालक आनी सचीव रानां खात्याच्या अधिकाऱ्यांची भेट घेतले. सद्या खूबशे नोंदणी नाशिल्ले टूर ऑपरेटर्स कसलीच जापसालदारकी नासतना गावगिऱ्या वाठारांनी भोंवड्यो व्हरतात. घुट्टी जावन पर्यावरणा विशीं चिंतेची गजाल उप्रासात, अशें खंवटे हांणी म्हणलें.

आमी पराग रांगणेकार हांकां बरोबर घेतल्यात. जे उण्यांत उणें धा लोकांक घेवन भोंवडेक व्हरतले. ते वेवसायाच्या हेतान न्हय तर पर्यावरणाच्या हेतान काम करतले. आमकां हे नोंदणी नाशिल्ले ऑपरेटर्स जाग्यार घालपा खातीर अधिकाऱ्यां कडल्यान सुचोवण्यो मागयल्यात. एकदां त्यो सुचोवण्यो आयले उपरांत रोखडेच ताची अंमलबजावणी करतले, अशी म्हायती खंवटे हांणी दिली.