भांगरभूंय | प्रतिनिधी
कसलेंय वळखपत्र दाखोवप गरजेचें
पणजीः दोना पावला जेटी भितर सद्या प्रवेशा वेल्यान कोंफुसांव चल्लां. गोंयकारांक जेटी भितर प्रवेश फुकट आसा. पूण तांकां प्रवेश दिवपा खातीर आधार कार्डाची मागणी केल्ल्या कारणान खूबशे फावटी कोंफुसांव चलता. पूण फक्त आधार कार्ड न्हय कसलेंय वळखपत्र जर गोंयकारांनी दाखयत जाल्यार तांकां प्रवेश फुकट आसा.
पयलीं दोना पावलाची जेटी ही सगल्यां खातीर उक्ती आशिल्ली. जेटी भितर जाय तेन्ना वचून भायर येवपाक मेळटालें. पूण वर्स 2023त पर्यटन खात्यान हे जेटीचें स्वदेश दर्शन हे केंद्रीय येवजणे खाला सोबीतीकरण केलां. पयलीं जेटी भितर जे पसरे आसले ते जेटी भायर घाल्यात आनी भितर बसपाक बांक, ग्रील, पेव्हमेंट बसोवन जेटीचो आकार वाडयला.
पूण हे सोबितीकरण जाले उपरांत पर्यटन खात्यान हे जेटीचें खाजगीकरण केलें. आतां हे जेटीर गेट बसयल्या आनी भितर वचपाक शुल्क घेतात. पयलीं ही गेट नाशिल्ली. कोणूय जाय तेन्ना भायर, भितर यो- वच करपाक शकतालो. आतां भितर सरतलो जाल्यार कावंटराचेर तिकेट काडची पडटा आनी ती दाखयल्यारच भितर प्रवेश मेळटा.
सद्या पर्यटकां खातीर शुल्क आसात आनी थळाव्या गोंयकारां खातीर शुल्क माफ आसा. नेण्ट्यां खातीर रु. 50 आनी भुरग्यां खातीर रु. 25 इतली तिकेट दिवची पडटा. गोंयकारांक कसलेंच शुल्क ना. पूण तिकेट ही काडचीच पडटा. पूण तिकेटीक पयशे दिवचे पडनात. पूण हे खातीर वळखपत्र दाखोवप सक्तीचें.
सद्या गोंयकार येतकच आधार कार्ड दाखय म्हूण कंत्राटदाराचे कर्मचारी सांगतात. पूण सगलेच जाण आधार कार्ड घेवन भोंवनात म्हूण लोकांनी खूब फावटी बोवाळ लेगीत घातला. आधार कार्डा वेल्यान कोंफुसांवा उपरांत आता गोंयचो पत्तो आशिल्लें खयचेंय वळखपत्र जेटीर मानून घेतात.
दोना पावाला जेटीर पयलीं ‘एक दुजे के लिए’ आनी उपरांत ‘सिंघम’ ह्या चित्रपटा उपरांत दोना पावला सामके फामाद जाल्ले. तेन्ना सावन पर्यटकांची घुट्टी दोना पावला जेटीर पळोवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
