भांगरभूंय | प्रतिनिधी
म्हजे मत
पयलीं सायन्स घेतलें जाल्यार आर्ट्सवाल्यां कडेन पळोवपाक लेगीत वेळ मेळनाशिल्लो. आतां सगले विशय मिक्स जाल्यात!
शिक्षण हें वाघिणीचें दूद आनी जो तें पियतलो तो गुरगुरल्या बगर रावचो ना, अशें संविधाचे डॉ. बाबासाहेब आंबेडकर हांणी सहज म्हणूंक नाशिल्लें. शिक्षणाचें खरें म्हत्व तांकां खबर आशिल्लें, देखूनच त्यांनी ‘शिका, संघटित व्हा आनी संघर्श करा’ हो संदेश दिल्लो. पूण आयचे शिक्षण वेवस्थेत जायते उणाव जाणवतात. सध्याच्या काळांत शिक्षकांची योग्य मोलावणी जाता काय ना, असो प्रस्न पडटा. पयलीं सारक्यो शाळा निरीक्षकांच्यो अचकीत भेटी आतां जायनात, देखून विद्यार्थ्यांच्या गिन्यानाची आनी आकलनाची प्रत्यक्ष परिक्षा जायना अशी परिस्थिती निर्माण जाल्या. नव्या शिक्षण धोरणांत खूप बऱ्यो गजाली आसात, पूण तांची अंमलबजावणी करप कठीण दिसता. नवीन शिक्षण धोरण विद्यार्थ्यां खातीर अपग्रेड काय अपडेट, हो प्रस्न आसाच. देशांत कितेंय नवें आयलें की आमी पयलीं थोडे भियेतात, मागीर विचार करतात आनी निमणे कडेन ‘चलता सायबा’ म्हणून तें आपणायतात. तशेंच कांय प्रमाणांत ‘राष्ट्रीय शिक्षण धोरणा बाबतींत जालां!
पयलींची 10+2 ही पद्दत गेली आनी आतां 5+3+3+4 ही नवी रचना आयल्या! पयलीं आमकां 10+2 म्हणजेच शाळा आनी कॉलेज इतलेंच खबर आशिल्लें. आतां ही नवी रचना आयले उपरांत कांय जाणांक दिसलें – हें शिक्षण धोरण काय मोबायलाचो पासवर्ड? पूण खरें सांगचें जाल्यार, ही पद्दत भुरग्यांचे पिराये प्रमाण शिक्षण समजपाक चड सोंपी करता. आतां पांचवे मेरेनचें शिक्षण मायभाशेंत मेळटलें, ही संवसारान मान्य केल्ली आनी एक उमेदीची गजाल आसा. पयलीं ‘A for Apple’ म्हणटना अर्द्या भुरग्यांक Apple खावपाकूच मेळनाशिल्लें, पूण आतां ‘अ आंब्याचो’ म्हणटना किमान ताची रुच तरी भुरग्यांक खबर आसतली!
आतां सवी सावनच भुरग्यांक ‘इंटर्नशिप‘मेळटली. आमी ते पिरायेचेर शाळा सुटली काय क्रिकेट खेळपाचे विचार करताले, पूण आतां भुरगीं म्हणटलीं, ‘आयज म्हाका कामाचेर वचपाचें आसा!’ आवय- बापायन ‘आरे अभ्यास कर’ अशें म्हणल्यार, भुरगीं सांगतलीं, ‘मम्मी- पप्पा, हांव एक प्रोफेशनल आसां!’
पयलीं सायन्स घेतलें जाल्यार आर्ट्सवाल्यां कडेन पळोवपाक लेगीत वेळ मेळनाशिल्लो. आतां सगले विशय मिक्स जाल्यात! म्हणजेच एक इंजिनिअर कविता बरोवंक शकता आनी एक कवी रोबोट तयार करपाक शकता! आतां कॉलेजांत केन्नाय येवप- वचप शक्य जातलें. एक वर्स शिकल्यार सर्टिफिकेट, दोन वर्सां उपरांत डिप्लोमा मेळटलो. थोड्या भितर सांगायचें जाल्यार, मन लागलें तर शिका, ना जाल्यार ‘ब्रेक’ घेयात! पूण या सगल्या बरे शिक्षण वेवस्थेची जर योग्य पद्धतीन अंमलबजावणी जाली ना, तर फुडल्या कितल्याशाच पिळग्यांचें नुकसान जावंक शकता. या नव्या शैक्षणिक धोरणाची योग्य अंमलबजावणी करण्याचें व्हड आव्हान मुळाव्या पांवड्यार आशिल्ल्या शिक्षक आनी शिक्षिकांक पेलचें पडतलें.
– गजानन बी. नायक भाटकार, पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
