भांगरभूंय | प्रतिनिधी
म्हापशें: नास्नोळ्यां जयदेववाड्यार एका घरांत १७ वर्सां पिरायेचे नेण्टे चलयेक दुबावीत मरण आयलां. मरण आयिल्ले चलयेचें नांव तिया नारायण परब आनी तें बारावेक शिकतालें. मंगळारा १९ तारखेक सांजवेळार सुमार ५ वरांचेर ही घडणूक उजवाडाक आयली.
मरण आयिल्ले चलयेची आवय कामारच्यान घरा आयली तेन्ना तिका चली खाटीचेर बेशुद्ध अवस्थेंत पडून आशिल्ली दिसली. चलयेचीं आवय-बापूय सकाळीं कामाक गेल्लीं. शाळेक सुटी आशिल्ल्यान तें घरांत एकलेंच आशिल्लें.
हे घडणुकेची म्हायती मेळटांच म्हापशें पुलीस थंय पावले. पंचनामो केले उपरांत ते चलयेची कूड पोस्टमार्टेमा खातीर गोमॅकॉंत धाडिल्ली. चलयेचेर कसलीच जखम मेळूंक नाशिल्ली. म्हापशें पुलिसांनी ह्या प्रकरणाची ‘दुबावीत मरण’ म्हणून नोंद केल्ली. मरणाचें नेमकें कारण स्पश्ट जावचें म्हूण चलयेची कूड काल पोस्टमार्टमा खातीर धाडिल्ली. आयज मेळिल्ल्या पोस्टमार्टम रिपोर्टांत, ते चलयेक सैमीक मरण आयिल्ल्याचें स्पश्ट जालें. तरी फुडल्या तपासणे खातीर डॉक्टरांनी तिचो व्हिसेरा राखून दवरला. म्हापशें पुलीस ह्या प्रकरणाचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
