भांगरभूंय | प्रतिनिधी
पणजी : झीज जाल्ल्या आनी बर्याच तेपा सावन चर्चेंत आशिल्ल्या वेळसांव दर्यादेगे वयलें सर्कल आतां परत पयले भशेन सुंदर केलां. वेळसांव पंचायतीन ’पारादीप फॉस्फेट्स लिमिटेड’ (PPL) कंपनीच्या ’सीएसआर’ (CSR) उपक्रमा खाला ह्या सर्कलाचें पुनरुज्जीवन केलां.
दर्यादेगेच्या ह्या नव्या रुपाक पळोवन थळाव्या नागरिकांनी खोस उक्त्तायल्या. कुठ्ठाळे मतदारसंघांत कार्यरत आशिल्ल्या हेर व्हड उद्देगांनी, जशें, वेर्णा इंडस्ट्रियल इस्टेट आनी हेर कंपनींनी, कायद्या प्रमाण सक्तीच्या आशिल्ल्या ’सीएसआर’ निधी वरवीं उदरगती खातीर फुडें सरचें, अशी मागणी थळाव्यांनी केल्या.
PPL कंपनीचे युनीट हेड सुरेश प्रामाणीक हांणी सांगलें, वेळसांव गांव हो आमच्या कंपनीचो शेजारी आनी आमी या गांवाचो विकास करूंक इत्सूक आसात. जेणें करून कंपनी आनी गांवांतले लोक एकवटान मुखार सरपाक शकतात. फुडल्या काळांत भलायकी आनी नितळसाण अशा हेर मळारूय कंपनी सहकार्य करतली, अशें मत प्रामाणीक हांणी उक्तायलें.
वेळसांवाची सरपंच डायना गुवेया हांणी सांगलें, वेळसांव गांवाक आपलें सतत सहकार्य दिवचें आनी नव्या पंचायत मंडळा सयत गांवाक फुडें व्हरचें.
कॉंग्रेस फुडारी ऑर्विल दोराडो हांणी सांगलें, एका गोंयकारान कंपनीचीं सुत्रां आपल्या हातांत घेतले उपरांत वेळसांव गांव आनी PPL कंपनी मदीं आशिल्लें संभ्रमाचें वातावरण आनी संबंद बदल्ल्यात. नुस्तेमारांचे फुडारी ओलेन्सियो सिमोएस हांणी लेगीत हेर कंपनींक थळाव्या गांवांच्या विकास कामांक आदार दिवपाचें आवाहन केलें.
#GoaNew #Velsao #Beach #Facelift #VelsaoBeachCircle #VelsaoPanchayat
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
