भांगरभूंय | प्रतिनिधी
लोकशायेंत मागण्यो मांडपाचो, योग्य माचयेर आवाज काडपाचो लोकांक पूर्ण अधिकार आसा.
लोकशाय घटमूट जावपाक विरोधक हे जायच. नाजाल्यार हुकूमशाय किल्लतली. ह्या विरोधकां मदीं आंदोलकूय आस्पावतात. नवी मुंबयच्या आंतरराष्ट्रीय विमानतळाच्या बारश्या वयल्यान सध्या वाद चलता. ताका शेतकरी फुडारी डी बी पाटील हांचेंच नांव दिवचें (आदल्या सरकारान बाळासाहेब ठाकरे हांचें नांव दिवपाचो निर्णय घेतिल्लो.) अशी एक याचिका आयल्या. तिचे वयले सुनावणे वेळार सरन्यायाधीश सूर्यकांत हांणी काल एक विधान केलें. तें खूब म्हत्वाचें. तांणी म्हणलें, ‘दरेका भारतीयाक कायदेशीर मार्गान शांततापूर्ण आंदोलन करपाचो हक्क आसा. पूण रस्त्यार देंवून सामान्यांक अडचण, त्रास करपाचो मात्तूय अधिकार ना.’ खरें तांचें. फक्त आंदोलनांच न्हय, तर रस्त्यां वयल्यो मिरवणुको, मोर्चा, धर्मीक कार्यावळींक लागून सामान्य लोकांक जायते फावटी त्रास, मनस्ताप जाता. हालींच मुंबय निशेध रॅली वेळार वरभर आडकून उरिल्ल्यान एक बायल मंत्र्याचेर तापली, तो व्हिडियो व्हायरल जाल्लो. मजा म्हणल्यार 99 टक्के नेटिझन्सांनी तिचे वटेन मतां उक्तायिल्लीं. हाचे वयल्यान आंदोलनांक भारतीय विटल्यात हें सिद्ध जाता.
लोकशायेंत आवाज काडप गरजेचेंच, पूण तो दुसऱ्यांचे वेदनेचें कारण जावपाक जायना. सामान्य भौसाक वांगडा घेवन आंदोलन करचें, तांकां वेठीक धरून न्हय. केन्नाय कांय कारणांक लागून राज्य बंद करतात. तेन्ना त्या कारणाक जापसालदार आशिल्ल्यांक मात पसून मनस्ताप जायना. हाल जातात, ते शाळेंत वचपी भुरग्यांचे, दिसवड्या वयल्या मानाय- कामेऱ्यांचे, भाजी विकपी बायलांचे, वाटेर गाडयेंत आडकल्ल्या दुयेंतींचे. बंद, आंदोलनाक लागून फुडाऱ्यांचें, अधिकाऱ्यांचें हाल हाल जाले, अशें चित्र सहसा दिसना. लोकांनी केल्ल्या उठावा वेळार श्रीलंका, नेपाळ, बांगलादेशांत मात तें दिसलां! मुंबय विमानतळाच्या बारश्या वयल्यान आंदोलन करपी तरणाट्यांचेर केशी घालप चालू आसा. तातूंत हस्तक्षेप करपाक सर्वोच्च न्यायालयान न्हयकार दिलो. ‘आंदोलनाच्या नांवा खाला कायदो हातांत घेवपाची, भंयाचें वातावरण निर्माण करपाची परवानगी दिवपाक मेळना. लोकशायेंत मागण्यो मांडपाचो, योग्य माचयेर आवाज काडपाचो लोकांक पूर्ण अधिकार आसा. सरकारान जाप दिवंक ना, जाल्यार शांततायेन आंदोलन करितूच रावंक जाय. म्हणटकच लोकशाय वेवस्थेंत निमणें सरकार आनी संबदीत अधिकाऱ्यांक ताचेर निर्णय घेवप गरजेचें हे जाणवता. विमानतळाक कोणाचें नांव दिवचें हो निर्णय घेवपाचें काम न्यायालयाचें न्हय. केंद्र सरकारान तें थारावपाचें’, अशेंय तांणी स्पश्ट केलें.
आंदोलन करपाचो अधिकार जायच, पूण सामान्यांक त्रास जावंक जायना ही भुमिका योग्यूच. दुसरे वटेन आंदोलक म्हणटात, व्हडल्या प्रस्नां कडेन सरकाराचें लक्ष ओडपाक रस्त्यार देंवचेंच पडटा. सामान्य पद्दतीन निवेदन दिल्यार सरकार, प्रशासन लक्ष दिना. ताका लागून चेपण हाडुंकच जाय. पूण, सरन्यायाधिशांक म्हणपाचें आसा, आंदोलन हिंसक, अडचणी निर्माण करपी नासचें. आंदोलनाचे पर्यायी मार्ग वापरूंक जाय. निशेध करपाक मैदानाचेर आमरण उपास करुं येता. हालींच आमदार विरेश बोरकारान केल्लो तशें. मोर्चा काडूं येतात, पूण येरादारीची कोंयडी जावंक फावना. धरणें धरचें. आतां जमीन रुपांतरा आड थळावे लोक बसल्यात तशे. आॅनलायन सही, सोशल मिडिया मोहीम चलोवं येता. राष्ट्रीय फुडाऱ्यांक, प्रतिश्ठीत लोकांक निवेदनां धाडूं येतात, न्यायालयांत वचूं येता. घेराव घालूं येता, पूण हिंसाचार टाळून, सभा घेवं येतात. आयज रस्त्यार देंवनासनासतना सोशल मिडिया वरवीं व्हडलें जनमत तयार करपाक मेळटा. पूण आमचे काय भाव, भयणी आंदोलन संस्कृती मानतात. ‘लोकजीण विस्कळीत जायना तो मेरेन सरकार गंभीरपणान घेना’, अशें तांचें मत. कांय बाबतींत तें खरें आसत, पूण आंदोलन करून आमच्याच भौसाक त्रास करप कितलें योग्य. तांकां जगपाचो अधिकार आसा, हें विसरून उपकारचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
