भांगरभूंय | प्रतिनिधी
कुटुंब ही विस्वास, मोग आनी समजूत हांचेर बांदिल्ली संस्था. जेन्ना मनीस मुद्दाम फट पातळटा वा दुसऱ्या विशीं चुकीची म्हायती दिता तेन्ना तो विस्वास मोडटा.
आपल्या फाटी फाटल्यान दुसऱ्याची निंदा करपी आनी तिरस्कार करपी लोक हो समाजांतलो एक गंभीर प्रस्न. अशा लोकांचो सभाव फटीचो, मत्सर आनी सुवार्थी आसता. मुखार गोड उलयतात, पूण फाटी फाटल्यान दुसऱ्यांची प्रतिमा इबाडपाचो यत्न करतात. खास करून कुटुंबा सारक्या नाजूक आनी भावनीक संबंदांत अशी प्रवृत्ती व्हड लुकसाण करपाक शकता. कोणाचेंय जिवीत फुलचे पयलीं तो मोडपाची प्रवृत्ती फक्त वैयक्तीक न्हय तर समाजीक नदरेनय धोक्याची आसता.
सद्या टीव्ही सिरियलांत अश्यो घडणुको खूबदां दिसतात. एकाच घरांत रावपी लोकां मदीं गैरसमज निर्माण करप, फट सांगून एकामेकां आड उलो मारप, नात्यांत दुबावाचीं बियां पेरप-हें सगलें सिरियलांत मुखार दाखयतात. प्रेक्षक हें मनरिजवण म्हणून पळयतात, पूण अनवळखीपणान कांय जाण तातूंतल्यान प्रेरणा घेवन वास्तव जिणेंत तशींच कामां करपाचो यत्न करतात. देखून सिरियलांतल्या काल्पनीक गजालींचो खऱ्या कुटुंबांचेर परिणाम जावपाक लागता.
कुटुंब ही विस्वास, मोग आनी समजूत हांचेर बांदिल्ली संस्था. जेन्ना मनीस मुद्दाम फट पातळटा वा दुसऱ्या विशीं चुकीची म्हायती दिता तेन्ना तो विस्वास मोडटा. घोव-बायल, सासण-धूव, भाव-भयण आदी संबंदांत दुबाव आयल्यार तो ल्हवू ल्हवू वाडून खंडीत जावंक शकता. अशा वेळार खरे गुन्यांवकार कोण हें कळनासतना निरपराधी लोकांक दोश दितात.
येवजण करपी लोक चड करून स्वताच्या अपेसाक लागून वा मत्सराक लागून दुसऱ्यांक सकयल ओडपाचो यत्न करतात. तांकां दुसऱ्याचें सूख सोंसूंक मेळना. ते खातीर ते दुसऱ्याच्या जिवितांत आडमेळीं निर्माण करतात. नव्या जोडप्यान आपलें जिवीत सुटसुटीतपणान सुरू करचें न्हय म्हणून फटीचीं उलोवपां पातळावप, गैरसमज निर्माण करप वा कोणाच्याय चरित्राचेर दुबाव घेवप अशा उण्या पांवड्यार वतात. हाका लागून जोडप्याचें जिवीत नाश जाताच, पूण ताचो परिणाम पुराय कुटुंबाचेरूय जाता.
दूरचित्रवाणी माळेंत चड करून अशे लोक हुशार आनी प्रभावी अशें दाखयतात, जाका लागून कांय प्रेक्षकांक चुकीचो संदेश मेळटा. खरें म्हणल्यार अशी वागणूक केन्नाच बरी सोंपना. कितलेंय फट लिपोवपाचो यत्न केलो तरी एक दीस तो उक्तो जातलो. पूण ते मेरेन जायते नातें इबाडिल्लें आसतलें, जें परतून हाडप कठीण जातलें.
हाचेर उपाय म्हणल्यार सगल्यांत पयलीं कुटुंबांतल्या वांगड्यांनी एकामेकांचेर विस्वास दवरपाची गरज आसा. कितेंय आयकून रोखडीच प्रतिक्रिया दिवचे परस ताचें सत्य तपासप गरजेचें. संवाद हो खंयच्याय संबंदाची बुन्याद. गैरसमज निर्माण जाल्यार संबंदीत मनशा कडेन थेट उलोवन तो निवळावपाचो यत्न करचो. तिसऱ्या मनशाच्या उतरांचेर कुड्डो विस्वास दवरप टाळचें.
तशेंच समाजांतल्या अशा प्रवृत्तीं आड जागृताय निर्माण करपाची गरज आसा. भुरग्यांक आनी तरणाट्यांक योग्य मुल्यां विशीं शिक्षण दिवप म्हत्वाचें, जाका लागून ते अशा नकारात्मक गजालीं पसून पयस रावतात. प्रसार माध्यमांनीय आपले जापसालदारकेची जाणविकाय करून सकारात्मक आनी वास्तववादी गजाली दाखोवपाचेर भर दिवपाक जाय.
निमाणें नात्यांत प्रामाणीकपण, विस्वास आनी मोग तिगोवन दवरप ही दरेकल्याची जापसालदारकी. फाटी फाटल्यान टिका करून वा कट करून कोणाचेंच बरें ना. उरफाटें समाजांत अविश्वास आनी ताण वाडटा. देखून आमी सगल्यांनी अशा वायट प्रवृत्तीं पसून पयस रावून आमचे संबंद तिगोवन दवरून एक भलायकेन भरिल्लो समाज तयार करपाचो यत्न करचो.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
