भांगरभूंय | प्रतिनिधी
पणजी: पर्यावरणाची जतनाय करतनाच खण उद्देगाची व्याप्ती वाडोवपाचेर सरकाराचो भर आसतलो. आतां 18 खण ब्लॉकांची पावणी जाल्या आनी वर्साक 19 दशलक्ष टन खण म्हाल काडप शक्य आसा. लो ग्रेड म्हालाचेर वैज्ञानीक पद्दतीन प्रक्रिया करून ताची मागणी वाडाेवपाचे आव्हान आसा, अशें मुख्यमंत्री डॉ. प्रमोद सावंत हांणी सांगलें. संवसारीक पांवड्या वेल्या खण परिशदेच्या उक्तावणा वेळार ते उलयताले.
हडफड्यां संवसारीक पांवड्या वेल्या खण परिशदेचें मंगळारा उक्तावण जालें. आतां मेरेन खण उद्देग हो गोंयच्या अर्थवेवस्थेचो कणो जावन आसा. खण उद्देगाक लागून राज्याची उदरगत जावपा सयत रोजगारीच्यो संदी तयार जाल्यो. खण वाठारांत हॉटेल, रेस्टॉरंण्ट, गॅरेजीस अशे बारीक मोठे वेवसाय सुरू जाले. सर्वोच्च न्यायालयाच्या आदेशाक लागून 2012 वर्सा राज्यातलो खण वेवसाय बंद जालो. खण वेवसाय बंद जाल्ल्यान राज्याचे अर्थ वेवस्थेक फटको बसलो. हजारांनी खण कामगार बेरोजगार जाले. खण उद्देग वाठारांत अर्थीक मंदी तयार जाली.
बंद पडिल्लो खण उद्देग सुरू करपा खातीर सरकारान बरेच येत्न केले. न्यायालयीन लडाये सयत खणी सुरू करपा खातीर ब्लॉकांची पावणी केली. आतां 18 ब्लॉकांची पावणी जाल्या. खण वेवसायाचो नेट वाडपा सारकी स्थिती आसा. हे फाटभुंयेर लो ग्रेड खण म्हाल आनी डंप म्हालाची मागणी वाडोवपाचें आव्हान आसा. लो ग्रेड खण म्हालाचेर वैज्ञानीक पद्दतीन प्रक्रिया करून ताची मागणी वाडोवपाची गरज आसा. देशांत स्टील निर्मितीचें प्रमाण वाडत आसा. खण म्हालाचेर प्रक्रिया करून ताची देशांतर्गत मागणी वाडोवपाची गरज आसा.
भारत हो सगल्यांत चड स्टील निर्मिती करपी संवसारातलो दुसरो देश आसा. स्टील निर्मितीक लागून खण उद्देगाक लेगीत नेट येतलो, अशी आस्त मुख्यमंत्री डॉ. प्रमोद सावंत हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
