भांगरभूंय | प्रतिनिधी
एका प्रकरणांत 200 पानांचें आरोपपत्र दाखल
पणजी: कुडचडें लैंगीक अत्याचार प्रकरणांतलो दुबावीत सोहम नायक हाचे आड पांच गुन्यांव दाखल जाल्यात. हातूंतल्या एका लैंगीक अत्याचार प्रकरणांत गुन्यांव फांट्यान केपेंच्या पयलो वर्ग न्यायालयांत सोहमा आड सुमार 200 पानांचें आरोपपत्र दाखल केलां. जाल्यार तातूंत 19 साक्षिदारांची साक्ष नोंद केल्या. आतां मेरेन सोहमा आड दोन गुन्यांवांत आरोपपत्र दाखल केलां. जाल्यार एका प्रकरणांत तो नेण्टो आशिल्ल्यान जुविनील जस्टीस मंडळा कडेन अहवाल सादर केला.
कुडचड्यार लैंगीक अत्याचाराचें प्रकरण मुखार आयिल्लें. उपरांत कुडचडें पुलिसांनी आयतार, 22 मार्च दिसा गुन्यांव दाखल करून दुबावीत सोहम नायक हाका अटक केल्ली. उपरांत दोगां नेण्ट्यां चलयांनी दोन वेगळ्यो वेगळ्यो कागाळी पुलिशेंत दाखल केल्याे. उपरांत वयलीं तिनूय प्रकरणां गुन्यांव फांट्या कडेन वर्ग केलीं.
ताचे उपरांत सोहमा आड आनीक दोन गुन्यांव दाखल केले. वयल्या पांच पैकीं गुन्यांव फांट्यान पयल्या गुन्यांवांत सोहमा आड केपेंच्या पयलो वर्ग न्यायालयांत आरोपपत्र दाखल केलां. जाल्यार दुसऱ्या गुन्यांवा वेळार दुबावीत सोहम 18 वर्सा पिराये सकयलो आशिल्ल्यान जुविनील जस्टीस मंडळा कडेन अहवाल सादर केला.
मजगतीं, 14 वर्सां पिरायेचे चलयेन कुडचडें पुलिशेंत कागाळ दाखल केल्ली. तातूंत दुबावीत सोहमान 2024 ते 2025 ह्या काळांत इंस्टाग्रामा वरवीं तिचे कडेन संपर्क सादलो. ताणें तिका स्वताचें अश्लील फोटे धाडले. तिचे व्हडले भयणी कडेन आशिल्लें नातें भौशीक करपाची धमकी दिली. तिका प्रत्यक्ष मेळपा खातीर आनी वासनापुर्ती खातीर चलयांची म्हायती दिवपाक सांगलें. कागाळीची दखल घेवन कुडचडें पुलिसांनी सोहमा आड गुन्यांव दाखल करून तपास सुरू केला. हें प्रकरण गुन्यांव फांट्या कडेन वर्ग केलां. ह्या प्रकरणांत गुन्यांव फांट्यान दुबावीत सोहमा आड केपेंच्या पयलो वर्ग न्यायालयांत 200 पानांचें आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
