भांगरभूंय | प्रतिनिधी
वेंचणुकेंतूय एकठांय येवन काम करतले
पणजी : एसटी समाज आनी गोंयच्या हिता खातीर सगल्यांनी एकठांय येवन काम करपाची गरज आसा. सगल्यांच्या हिता खातीर हांव, गोविंद गावडे आनी सभापती गणेश गांवकार एकठांय आयल्यात. आमी वेंचणुकेंतूय एकठांय येवन काम करतले, अशें आदिवासी कल्याण खात्याचे मंत्री रमेश तवडकार हांणी म्हणलें. आमी तिगूय २५ मेक प्रेरणा दिसा निमतान जावपी कार्यावळींतूय एकेच माचयेर आसतले, अशेंय तांणी म्हणलें.
मंत्रिमंडळ बसके उपरांत मंत्रालया भायर उलयतना आदिवासी कल्याण खात्याचे मंत्री रमेश तवडकार हांणी हें वक्तव्य केलें. मंत्रिपद तशेंच हेर गजालीं विशीं मंत्री रमेश तवडकार आनी आमदार गोविंद गावडे हांचे मदले मतभेद हो चर्चेचो विशय आशिल्लो. आमचे मदीं आतां कसलेच तरेचे मतभेद नाशिल्ल्याचें मंत्री रमेश तवडकार हांणी स्पश्ट केलें.
समाज आनी गोंयच्या हिता खातीर जे यत्न करपाक जाय, ते सगले यत्न हांव करतलों. हे विशीं आमचे मदीं म्हयन्या पयलींच चर्चा जाल्या. पयलीं कितें घडलें, तो इतिहास आतां पोखरपाची गरज ना. चर्चेवेळार दोगांयनी आदलो इतिहास कुशीक दवरिल्लो. आमदार म्हणून गोविंद गावडे हांकां ह्यान फुडें म्हजें फाटबळ आसतलें, अशें तांणी म्हणलें.
विधानसभेंत एसटी आरक्षणाच्या कार्यवाही खातीर आतां अधिसुचवणी काडपाची गरज आसा. हे खातीर प्रधानमंत्री नरेंद्र मोदी आनी गृहमंत्री अमित शहा हांची शिश्टमंडळ भेट घेतले. २०२७चे वेंचणुके पयलीं एसटीक आरक्षण मेळचें, अशे आमी यत्न करतात, अशें मंंत्री रमेश तवडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
