भांगरभूंय | प्रतिनिधी
खर कार्यवाये खातीर गस्त दवरपाची वेवस्था
पणजी : राज्यांत दर वर्सा प्रमाण अंदूं ३१मेच्या मध्यानराती सावन नुस्तेंमारी बंदी लागू जातली. जून आनी जुलय हे दोन म्हयने ही बंदी आसतली, अशें नुस्तेंमारी खात्याचे मंत्री निळकंठ हळर्णकार हांणी सांगलें. नुस्तेंमारी बंदीच्या कार्यवाये खातीर खर गस्त दवरपाची वेवस्था आसतली, अशें तांणी सांगलें.
गोंय दर्यो नुस्तेंमारी नियमन कायदो १९८० प्रमाण ही बंदी लागू जाता. ट्रॉलर वा यांत्रीक बोटी वरवीं नुस्तेंमारी करपाचेर बंदी आसता. होडयो वा १० एचपी मोटराचेर चलपी यांत्रीक व्हड्यां वरवीं मात नुस्तेंमारी करपाची मेकळीक आसता.
भारत हो व्हड देश आसा. नुस्तेंमारी करपी लोक चड आनी बोटी चड आशिल्ल्यान कार्यवाय करप कठीण आसता. तरी लेगीत नुस्तेंमारी बंदीचे कार्यवाये खातीर गस्त दवरपाची वेवस्था आसतली. हाचे पयलीं लेगीत सरकारान बेकायदो नुस्तेंमारी करपी बोटींचेर कारवाय केल्या, अशें तांणी सांगलें.
नुस्तेंमारी खात्यान खासा नुस्तें पोसपी उपक्रम (फीशींग एग्रीकल्चर) सुरू केल्यात. चोणाक, सुंगटां, कुल्ल्यो उपलब्ध जाता तशें लोकांक उपलब्ध करतले, अशें तांणी सांगलें. नुस्तेंमारी बंदी काळांत साठोवन दवरिल्ल्या नुस्त्याची विक्री जाता. ही वेवसायीक गजाल आशिल्ल्यान हाचेर खात्याचें नियंत्रण नासता, अशें मंत्री निळकंठ हळर्णकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
