भांगरभूंय | प्रतिनिधी
दिसांतली पांच ते धा वरां भुरगीं मोबायलाचेरूच आशिल्ल्यान भुरग्यांची शारिरीक आनी बौद्धीक वाड खुटत चल्ल्या.
आयचें यूग हें विज्ञान तंत्रज्ञानाचें यूग समजतात. 21व्या शेंकड्यांतल्या विज्ञान तंत्रज्ञानाच्या युगांत स्मार्ट फोन, इंटरनेट हे दरेकाच्या जिणेंतलो अविभाज्य घटक जाल्यात. फक्त घरांतल्या व्हड मनशां कडेनच न्हय जाल्यार शाळेंतल्या भुरग्यां कडेन लेगीत मोबायल फोन पळोवंक मेळटात. कोरोना काळांत ऑनलायन शिक्षणा खातीर पालकांनी घेवन दिल्लो मोबायल आयज लेगीत भुरग्यांच्या हातांत आसा. होच मोबायल आयज भुरग्यांचे सामको लागींचो इश्ट जाला. सकाळीं उठत सावन रातीं न्हीद मेरेन भुरगीं मोबायलार चिकटून बशिल्लीं आसतात. आयच्या विज्ञान तंत्रज्ञान युगांत मोबायल हो गरजेचो आसा. तो गरजे पुरतोच वापरूंक जाय, पूण आयज भुरग्यां खातीर मोबायल हेंच सर्वस्व जालां.
आयच्या भुरग्यांक मोबायलान भुरळ घाल्या. दिसांतली पांच ते धा वरां भुरगीं मोबायलाचेरूच आशिल्ल्यान भुरग्यांची शारिरीक आनी बौद्धीक वाड खुटत चल्ल्या. ताका लागून भुरग्यांचें भुरगेपण शेणत चल्लां काय कितें असो दुबाव येता. आयचीं भुरगीं व्हड प्रमाणांत टीव्ही, संगणक, मोबायल, इंटरनेट, व्हिडियो गेम, व्हॉट्सअॅप, फेसबूक, इंस्टाग्राम ह्या सारक्या सोशल मिडियाचेर चड आसतात. तंत्रज्ञानरुपी राकेसान भुरग्यांचें भुरगेपणच खावन उडयलां.
पयलीं शाळांक सुटयो पडटकच गांवांगांवांतलीं मैदानां भुरग्यांनी भरून वतालीं. पूण आयज तीं मैदानां विज्ञान तंत्रज्ञानाच्या युगांत ओस पडिल्ल्याचें चित्र पळोवंक मेळटा. क्रिकेट सोडून एकूय मैदानी खेळ खेळटना भुरगीं दिसनात. देशी खेळ जाल्यार आयच्या भुरग्यांक खबर लेगीत ना. गड्ड्यांनी, कोंयडोबालांनी खेळटना कोणूच दिसून येनात. थोडे गांवगिरे खेळ अशे आसात ते आयच्या भुरग्यांक खबर लेगीत ना. व्हड रिंगण घेवन तातूंत गड्ड्यांचो डाव लायिल्ल्याचें चित्र आयज पळोवंक मेळना. लिपचेल्यांनी हो खेळ जाल्यार आतांच्या भुरग्यांक खबर लेगीत ना. पोरण्या कपड्यांचो बॉल तयार करून एकामेकांचेर जोखून मारप हो खेळ लेगीत हालींच्या भुरग्यांक खबर ना.
कोंयडेबाल, लगोरी, रिंगानी खेळप हे खेळ आतां दुर्मीळ जायत चल्ल्यात. लंगडी हो खेळ आतां फक्त शाळेंतल्या पीटीच्या वरा पुरतोच उरला. ह्या खेळांक लागून भुरग्यांचो शारिरीक व्यायाम जातालो. संघभावना, एकवट, आपुलकी, फुडारपण हे गूण ह्या खेळांक लागून विकसीत जाताले. ह्या खेळाची सुवात आतां टीव्ही, संगणक, मोबायल व्हिडियो गेम हांणी घेतल्या. टीव्ही, मोबायल, संगणक, व्हिडियो गेमीक लागून भुरग्यांक विवीध खेळांची म्हायती उपलब्ध जावन तातूंतल्यान भुरग्यांचो बौद्धीक विकास जाता अशें दिसता आसलें तरी तांचो शारिरीक विकास खुटत चल्ला हाचो समाजांतल्या सगल्या घटकांनी गंभीरतायेन विचार करपाची गरज आसा. भुरग्यांक परतून मैदाना कडेन हाडपाची जापसालदारकी पालक, शिक्षक आनी समाजांतल्या सगल्याच घटकांची आसून तांणी हाचे कडेन गंभीरतायेन विचार करपाची गरज आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
