भुरग्यांक रांदचे कुडींतलीं कामां शिकोवचीं

भांगरभूंय | प्रतिनिधी

 प्रत्येक भुरग्यान आपलें ताट, पेलो, बशी वेगळी दवरल्यार बरें. म्हणटकच दिसाक पांच फावटी उदक पियेल्यार…..

आयचे वेगवान जिणेंपद्धतींत जायत्या ल्हान भुरग्यांक रांदचे कुडींतलीं सादीं कामां लेगीत जमनात. मोबायल फोन, टिव्ही, इंटरनेट आनी अभ्यासाच्या बोवाळांत घरांतलीं कामां शिकपाची सवय उणी जायत चल्ल्या. पूण भुरगीं (चलयो आनी चलेय) सुमार 10 वर्सांचीं जातकच, तांकां ल्हवू- ल्हवू रांदचे कुडींतलीं सुरक्षित आनी सोपीं कामां शिकोवप सामके गरजेचें. हाका लागून तीं फकत स्वावलंबी जायनात, तर तांकां जापसालदारकी, शिस्त आनी कुटुंबातल्या सहकार्याचें म्हत्वूय समजता.

ल्हान पिरायेर सुरवात 

ल्हान भुरग्यांक सुरुवातीक एकदम सादीं आनी सुरक्षीत कामां दिवं येतात. शिस्तीची संवय लावपा खातीर सकयल दिल्लीं कामां दिवन पळोवचीं. हें करतना तुमी वा हेर कोणें वांगडा रावचें. 

भाजी आनी फळांची नितळसाण:  चिटक्यो, वालपापडी मोडप, तांदूळ वेंचप, लसूण सोलप, कोथमीर वा पालक नितळ उदकान धुवप. फळां वेवस्थित धुवन तीं मेजार दवरप. बाजारांतल्यान कोणें सामान हाडलें काय तें डब्यांत, फ्रिजांत दवरप.

मेज आनी आयदनांची मांडणी:  जेवणा पयलीं आनी जेवण जातकच ताटां- बश्यो मांडप, काडप, घासप. चमचे धुवून जाग्यार दवरप, डबे पुसून दवरप, जेवण वाडप. (पापड, लोणचें बी.) 

अन्नाची मुळावी हाताळणी: चपाते खातीर मळिल्ल्या पिठाचे ल्हान गुळे करप, सॅलड वेगवेगळ्या आकारांत सोबोवप वा फ्रिजांत वस्तू वेवस्थित दवरप.

वांगडी म्हणून मदत : आवय वा हेर कोणूय च्या वा फोव करतना तांकां लागपी सामान कपाटांतल्यान हाडून दिवप, मिक्सर चलतना ताचे वयलें धांपणें घट्ट धरप वा पीठ मळटना ल्हानशी मदत करप. आवयची मजतनीस म्हूण काम करप. 

सुरक्षेची शिटूकसाण : हे पिरायेर भुरग्यांक गॅस, गरम तेल, धारदार सुरी वा उकळटें उदक अशा धोक्याच्या गजालीं पसून सदांच पयस दवरप चड गरजेचें.

रांदपाचें पुराय शिक्षण

भुरगीं जशीं व्हड जातात आनी सुमार 18 वर्सांचीं जातात, तेन्ना तांकां खऱ्या अर्थान स्वतंत्रपणान रांदपाक शिकोवपाची चड गरज आसता. ही पिराय घर सोडून भायर वचपाची (उच्च शिक्षणा खातीर वा नोकरे खातीर) आशिल्ल्यान सकयल दिल्ल्या मुद्यांचो तांच्या शिक्षणान आस्पाव करचो.

रांदपाची मुखेल तयारी: सुरी सुरक्षीतपणान कशी वापरची हें शिकोवन वेगवेगळ्यो भाजयो वेवस्थित कापप, कड्डण वळखप आनी तीं भिजत घालप, सुकीं कशीं दवरप हाचो अभ्यास जावप गरजेचो.

गोंयच्या आहाराची वळख (नुस्तें उजरावप) : सुमार 18 वर्सांच्या भुरग्यांक नुस्तें उजरावप आनी तें रांदपा खातीर मीठ, मसालो लावन तयार करप हें एक व्हड कौशल्य. तें तांकां शिकोवचें. गोंयचे जीनस शिकोवप हो एक वेगळो विशय. आयज गोंयचें पारंपरीक खाणां करपी लोक उणें जाल्यात.

सदचे पदार्थ : वरण (दाळ), सोंपी भाजी, च्या, कॉफी आनी वेगवेगळीं सरबतां स्वतंत्रपणान आनी रुचीक कशीं करचीं, हाचें प्रात्यक्षिक तांकां मेळपाक जाय. प्रत्येक भुरग्यान आपलें ताट, पेलो, बशी वेगळी दवरल्यार बरें. म्हणटकच दिसाक पांच फावटी उदक पियेल्यार वा कितेंय खाल्यार पाच पेले, बशयो जावच्यो नात. त्यो घासपाकूय शिकपाक जाय. आयतारा युट्यूबार पळोवन तांकां एखादो जिनस करपाक सांगपाक जाय. 

भुरग्यांच्या विकासाचेर जावपी परिणाम

स्वावलंबन : ‘आपलें काम आपणूच करप’ ही भावना भुरग्यांक फुडाराक हॉस्टेलांत वा परक्या गांवांत नोकरे खातीर वतना खंयच्याच संकश्टाक फुडो करपाक बळगें दिता. बिराडाक, हाॅस्टेलांत रावपाची वेळ येवचे पयलीं भुरग्यांनी कपडे उमळप, च्या, काॅफी करप, शीत, हुमण, तळप इतलें तरी शिकपाक जाय. 

संयम आनी वेळाचें नियोजन : रांदप ही एक कला. भाजी नितळ धुवप, जाय तितलेंच अन्न शिजोवप, वेळार रांदप आनी वस्तू जाग्यार दवरप हाका लागून भुरग्यां भितर शिस्त आनी संयम निर्माण जाता.

अन्नाचो आदर आनी कश्टाची वळख : आवय- बापूय आपले खातीर रांदचे कुडींत कितले कश्ट काडटात, हाची जाणीव भुरग्यांक जाता. हाका लागून अन्न ताटांत सांडपाची तांची सवय ना जाता.

नातें घट जाता

मानसिक बळगें आनी टीमवर्क : संशोधना प्रमाण, जीं भुरगीं घरांतल्या कामांनी मदत करतात, तीं मानसिक नदरेन चड जबाबदार, आत्मविश्वासू आनी पंगडान काम करपी जातात. कुटुंबा वांगडा तांचें नातें आनीक घट्ट जाता.

रांदप शिकोवप म्हणजे भुरग्यांचेर कसलेच वजें वा बळजबरी करप न्हय, तर तांकां एक मोलाची कुशळटाय शिकोवप. थोड्या आवयांक चल्यान रांदप बी आवडना. ‘आमचे कडेन वावराडी आसा, भरपूर इश्टेट आसा, आमी कित्याक रांदपाचें’, अशेंय म्हणपी लोक आसात. पूण, फुडाराच्या जिविता खातीर ही कुशळटाय पुस्तकी गिन्याना इतलीच म्हत्वाची आसा. देखून पालकांनी भुरग्यांक मोगान, संयमान आनी सुरक्षितेची पुराय काळजी घेवन रांदचे कुडीच्या  प्रवासांत वांटेकार करून घेवपाक जाय. तेंय बी 8 -10 वर्सां जातात तेन्ना सावन. मागीर 20 वर्सांच्या चल्याक सोडात, चलयेक पसून कितेंय सांगल्यार तें आयकना. 

– ज्ञानदीप पोतेकार

फोंडें