भांगरभूंय | प्रतिनिधी
मडगांव : मडगांवच्या इतिहासीक कोमुनिदाद इमारतीची सध्याची बाबत अवस्था आनी कांय दिसांनी येवपी पावस, हें लक्षांत घेवन भौशीक बांदकाम विभागान दक्षीण विभाग कोमुनिदाद प्रशासकीय इमारतीचे दुरुस्ती खातीर वर्क ऑर्डर जारी केल्या.
इमारतीच्या देखभालीचें हें काम पर्वरेच्या मेसर्स सुपरकॉन्स इंजिनिअर्स अँड कॉन्ट्रॅक्टर्स प्रायव्हेट लिमिटेड हे कंपनीक २.९६ कोटी रुपयांक दिलां. हें निविदा मूल्य मूळ अंदाजपत्रका परस म्हळ्यार २.११ कोटी रुपयां परस सुमार ३९.९८ टक्के चड आसा. ह्या प्रकल्पाचें काम १८ मे २०२६ सावन सुरू जातलें, तें १३ मार्च २०२७ मेरेन म्हळ्यार ३०० दिसांनी पुराय करपाचें उद्दीश्ट दवरलां.
दक्षीण गोंयांतल्या काणकोण, चिकोळणा, चिंचणी, लोटली, मडगांव, बाणावली आनी नागोवा कोमुनिदादच्या प्रतिनिधींनी हे इमारतीची दुरुस्ती करपाची मागणी लावन धरिल्ली.
पावसा पयलीं पांख्याची दुरुस्ती करप सामकें गरजेचें, जाका लागून गळतीक लागून ईतिहासीक कागदपत्रांचें लुकसाण जावचें ना. अतिरिक्त जिल्लोधिकार्यांचे हाजेरींत जाल्ले बसकेंत सांगलें, अर्थ विभागा कडल्यान खर्चाक मंजुरी मेळटांच कामाक सुरुवात करतले. ते प्रमाण आतां कार्यकारी अभियंत्यांनी कंत्राटदाराक बेगोबेग कामाक लागपाचे निर्देश दिल्यात.
ह्या इतिहासीक वास्तुी राखण करपा खातीर आनी पावसांत जावपी लुकसाण टाळपा खातीर सरकारान हें पावल उबारलां. इमारतीच्या सुधारीत कोयर निचरा वेवस्थे सयत पोरणे नोंदीचें जतन करपाचेरूय हे प्रक्रियेंत भर दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
