भांगरभूंय | प्रतिनिधी
पणजीः आरजी मदलें कोफुसांव सोंपपाची कसलींच चिन्नां दिसनात. हो विशय सुटावो करपाक आरजीपीचे अध्यक्ष मनोज परब आनी पदाधिकार्यां वांगडा आयज सोमारा आपयल्ले चर्चेक हजर रावपाक आरजीपीचे आमदार वीरेश बोरकर हांणी न्हयकार दिला. पूण हे विशीं प्रतिक्रीया दितना आरजीपीच्या केंद्रीय समितीन सांगलें, ही बसका जातलीच.
मनोज परब आनी विरेश बोरकार हांचे मदीं चलिल्लो वाद सोंपोवपाक पक्षाचे केंद्रीय कार्यकारी समितीन आयज सांजेवेळार पक्षाच्या पणजेच्या मुख्यालयांत जावपी आमदार विरेश बोरकार हांकां आमंत्रण दिल्लें. ३ ते ७ वरां मजगतीं बोरकार हांचे सयत तांचे तीन पदाधिकारी आनी पक्षाचे मुखेली मनोज परब, विश्वेश नायक हांचे मदीं चर्चा जावन तडजोड जावपाची आशिल्ली. मात बोरकार हांणी केंद्रीय समितीचें आवाहन भायरावन बसकेक वचपाचें न्हय असो निर्णय घेतिल्ल्याचें ‘भांगरभूंय’ कडेन उलयतना स्पश्ट केलें.
हांव सद्या गोंयांत ना देखून हांव बसकेक पावपाक शकचों ना. सद्या जे आरोप म्हजेर जाल्यात ताका लागून हांव सामको दुखावलां. म्हजोच पक्ष, म्हजेच मनीस हे भशेन आरोप करतले म्हूण हांवें चितूंक नाशिल्लें, अशी खंत बोरकार हांणी उक्तायली.
हे विशीं आरजीपीचे भांडारी अजय खोलकार हांणी सांगलें, बोरकार हांणी केंद्रीय समितीक बसकेक हाजीर रावचो ना अशें अधिकृत रितीन कळीत करूंक ना. देखून ही बसका जातली.
आमचे वटेन हें कोफुसांव बंद करपा खातीर मना काळजा सावन यत्न आमी करतात. मात बोरकार हांणी फुडें येवन उलोवपाक जाय आनी तांचे मनात कितें आसा तें सांगपाक जाय. तांच्यो कितें मागण्यो आसात त्यो मान्य करपाक आमी तयार आसात. मात ते आमच्या वांगडा येवन उलयनात, जाल्यार हो विशय सुटावो जातलो तरी कसो? अशें खोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
