भांगरभूंय | प्रतिनिधी
पणजी: बांबोळेच्या नियाज रेस्टॉरंटा लागसार काल रातीं कंटेनर उमथलो. ह्या अपघाताक लागून बांबोळे कडल्यान पणजे वचपी येरादारी ठप्प जाली. कामगार वर्ग आनी हेर प्रवाशांक हाका लागून बरेच त्रास सोंसचे पडले. ह्या अपघाताचें कारण आजून समजूंक ना.
हे घडणुकेची गंभीर दखल घेवन येरादारी पुलीस अधीक्षकांनी प्रवाशां खातीर ऍडव्हायझरी जारी केल्या. बांबोळे कडल्यान पणजे वटेन वचपी वाहनांक सांताक्रूझच्या नेक्सा शोरूम मार्गान वळयलीं. तशेंच दक्षीण गोंयच्यान पणजी वा उत्तर गोंयचे दिकेन येवपी सगल्या जड वाहनांक बोरये-फोंडें मार्गाचो वापर करपाच्यो सुचवण्यो येरादारी पुलिसांनी केल्यो. घडणुके सुवातेर पुलीस दाखल जाल्यात. अपघात जाल्लो कंटेनर कुशीक काडपाचें काम सध्या चालू आसा.
गोंयांत काल पडिल्ल्या पावसाक लागून जायते कडेन रस्त्याचेर निसरपाक जाता. हे फाटभूंयेर वाहन चालकांनी रस्त्योवल्यान वतना सादूर रावन वाहन चलोवपाचो उलो प्रशासनान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
