भांगरभूंय | प्रतिनिधी
पणजी: रिव्होल्युशनरी गोवन्स पार्टींतलो भितरलो मतभेद आनी गटबाजी आतां सगल्यां मुखार आयल्या. पक्षांत फूट पडिल्ल्याचें स्पश्ट जालां. पक्षाचे मुखेली मनोज परब हांचे अध्यक्षतेखाला पणजेच्या पक्ष कार्यालयांत केंद्रीय समितीची म्हत्वाची बसका जाली. हे बसकेक विश्वेश नायक, अजय खोलकार आनी हेर फुडारी हाजीर आशिल्ले. मात पक्षाचे एकूच आमदार विरेश बोरकार हांचे सयत तांच्या गटांतले ४ मुखेल फुडारी हे बसकेक हाजीर रावूंक ना.
पक्ष विसर्जीत करपाचो कसलोच प्रस्ताव ना: खोलकार
मजगतीं, साजेवेळार चार वरांचेर रिव्होल्युशनरी गोवन्स पार्टीचे बसकेक सुरवात जाल्या. ह्या वेळार आरजीपीचे पदाधिकारी अजय खोलकार हांणी सांगलें, पक्ष विसर्जीत करपाचो कसलोच प्रस्ताव ना. कायद्या प्रमाण कोणाक एकल्याक तें करपाक मेळना. पक्षाक बदनाम करपी ज्युलियस आल्मेदा वांगडा भोंविल्ल्यान, तशेंच पक्षा आड बसका घेतिल्ल्यान आमदार विरेश बोरकार हांकां पक्षान कारणां दाखयात नोटीस धाडल्या, अशें तांणी स्पश्ट केलें.
ज्युलियस आल्मेदा सयत कांय जाण पक्षांत घालतात फूट: मनोज परब
ज्युलियस आल्मेदा सयत कांय जाण हिंदू- क्रिस्तांव मुद्यावेल्यान पक्षांत फूट घालपाचे यत्न करता. तशेंच विरेश आनी मनोज वेगळे आसात अशें चित्र ज्युलियस आल्मेदा तयार करता अशें आरजीचे मुखेली मनोज परब हांणी ह्या वेळार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
