भांगरभूंय | प्रतिनिधी
चिखलेच्या जॉगर्स पार्कांत ‘दाबोळी म्युझिकल वेव्हज’ संगीत महोत्सव सुरू
वास्को: गोंय फकत दर्यादेगां पुरतें मर्यादीत दवरिनासतना, गोंयांक बळीश्ट पर्यटन आनी मनोरंजनाचें थळ म्हणून फुडें हाडपाक शासन यत्न करता. आयची कार्यावळ हाचोच एक भाग, अशें पर्यटन मंत्री रोहन खंवटे हांणी म्हणलें. ते चिखलेच्या जॉगर्स पार्कांत आयोजीत २ दिसांच्या ‘दाबोळी म्युझिकल वेव्हज २०२६’ संगीत महोत्सवाचे उक्तावण कार्यावळी वेळार उलयताले. शासनाच्या यत्नांचोच हो एक भाग आसा. अशा महोत्सवांक लागून थळाव्या कलाकारांक संद मेळटा आनी दक्षीण गोंयचें पर्यटनूय चालीक लागता, अशें तांणी मुखार म्हणलें.
लायव्ह संगीत, नाच आनी वेगवेगळ्या संस्कृतीक कार्यावळीं खातीर हांगा पयल्याच दिसा लोकांनी गर्दी केल्ली. हो सुवाळो शेनवार आनी आयतार दोन दीस चलतलो. गोवा पर्यटन खात्या वतीन आयोजीत केल्ल्या ह्या महोत्सवाचे सुवातेर केल्लो उजेड आनी संगीताच्या सुरांनी एक वेगळीच उमेद हाडली. वास्को आनी लागशिल्ल्या वाठारांतलीं कुटुंबां, तरणाटे आनी संगीत मोगी ह्या उकत्या मैदानांतल्या सुवाळ्याची उमेद घेतना दिसले.
‘अभंग रिपोस्ट’ पंगडाची खाशेली कामगिरी
पयल्या सांजवेळचें मुखेल आकर्शण म्हळ्यार लोकांच्या आवडीच्या ‘अभंग रीपोस्ट’ ह्या संगीत पंगडाचो प्रयोग आशिल्लो. तांच्या सादरीकरणान सगल्या प्रेक्षकांची काळजां जिखलीं. लोकांनी तांच्या गाण्यांचेर ताल धरून नाच केलो.
संगीता वांगडाच वेगवेगळ्या पंगडांच्या नृत्यान आनी माचये वयल्या सादरीकरणान महोत्सवांत रंगत हाडली. हाका जोडूनच खाद्यपदार्थांचे स्टॉल्स आनी खेळाच्या वाठारांतूय लोकांनी खोशेन वेळ पासार केलो.
मनोरंजन आनी पर्यटन विकास
पंचायत मंत्री मावीन गुदिन्हो हांणी सांगलें की, थळाव्या लोकां मेरेन दर्ज्याचें मनोरंजन आनी पर्यटनाविशींचे उपक्रम पावोवप, आनी वांगडाच ह्या वाठारांत पर्यटकांक आकर्शीत करप, हो या महोत्सवाचो मुख्य उद्देश आसा. पयल्याच दिसा मेळिल्ल्या उत्स्फुर्त प्रतिसादाचेर तांणी समाधान उक्तायलें आनी दक्षीण अशे आनीकय संस्कृतीक सुवाळे जावपाक जाय, अशी इत्सा उक्तायली.
आयजूय कार्यावळी जातल्यो
हो महोत्सव आयतारा सांजवेळा ६ वरां सावन चिखलेच्या जॉगर्स पार्कांत असोच फुडें चालू उरतलो. आयज सांजवेळार ‘द ७ नोट्स बँड’ आनी ‘सॉनिक द बँड’ हांचे वांगडाच हेर ओडलायण्यो कार्यावळी जावपाच्यो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
