भांगरभूंय | प्रतिनिधी
कोंकणी समारोह २०२६चें मंगळुरूंत उक्तावण
पणजी: फुडाराक आधुनीक तंत्रज्ञान वापरून कोंकणी भास अदीक घटमूट आनी बळिश्ट करची अशें प्राध्यापक सुलक्षणा सावंत हांणी सांगलें. ती शक्तीनगर- मंगळुरूंत कोंकणी भास आनी संस्कृती प्रतिश्ठान, विश्व कोंकणी केंद्रान आयोजीत केल्ल्या कोंकणी समारोह २०२६चे उक्तावण कार्यावळी वेळार उलयताली.
ह्या वेळार सुलक्षणा सावंत हांचे वांगडा अध्यक्ष नंदा गोपाल शणै, उपाध्यक्ष किरण बुडकुले, सचीव कस्तुरी पै, कवी मेल्वीन रोड्रिग्स, कवी एचैम पेरनाल आनी हेर मानेस्त माचयेर हाजीर आशिल्लीं.
सुलक्षणा सावंत हांणी मुखार सांगलें, तियात्र, संगीत आनी सिनेमान कोंकणी भास गिरेस्त केल्या. शणै गोंयबाब आनी बस्ती मामाचें योगदान विसरूंक फावना. कोंकणी भास ही आमची वळख आनी अस्मिता. तिची राखण करूंक आमी बांदील आसात. कोंकणी संगीतान आमकां एका सुत्रान गुंथल्यांत, बांदल्यांत हें आमी विसरुंक नज. आयज आमी पांच गजाली करुंया, कोंकणी भास उलोवया, भेस सांबाळुया, भजनां कोंकणींत करुया, भोजन संस्कृती जपुया, आनी भोंवडी करूया तेन्नाच कोंकणी गिरेस्त जातली.
नंदा गोपाल शणै हांणी येवकाराचें उलवप करतना, कोंकणी भास आनी संस्कृतीची राखण करून कोंकणी भास सांबाळपा खातीर गोंय, केरळ, मंगळुरू आनी महाराष्ट्र राज्यांतल्यान लोकांनी मोलादीक वावर केला. ताचो अभिमान आमकां आसा. अशें म्हणीत तांणी सगल्यांक येवकार दिलो.
कवी एचैम पेरनाल हांणी कोंकणी साहित्य अकादेमीचे वतीन कार्यावळीची म्हायती दिली.
विजयलक्ष्मी नायक हिणें मुखेल सोयरी प्रा. सुलक्षणा सावंत हांणी वळख केली.
डॉ किरण बुडकुले हांणी, कोंकणी साहित्यांत बाल साहित्याची गरज आनी म्हत्व हिचेर आपलें उलोवप केलें.
साहित्य अकादमी संयोजक मेल्वीन रोड्रिग्स हांणी समिक्षकांचें साहित्यांत योगदान विशयाचेर उजवाड घालो, समिक्षकान साहित्याची मोलावणी करतना लेखकांचे मदीं भिरांत घालची न्हय, निसुवार्थी नदर दवरून पुस्तक मोलावणी करची अशें रोड्रिग्सान सांगलें.
सुत्रसंचालन सुचित्रा शणै हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
