भांगरभूंय | प्रतिनिधी
दुसरे याचिके वयली सुनावणी जुलयांत निश्चीत
भांगरभूंय । प्रतिनिधी
पणजी : फोंडें विधानसभा मतदारसंघांतली पोटवेंचणूक रद्द करपाच्या गोंयांतल्या मुंबय उच्च न्यायालयाच्या निर्णयाक सर्वोच्च न्यायालयांत आव्हान दिवपी गोंय काँग्रेसीचे फुडारी डॉ. केतन भाटीकार हांकां शुक्रारा फांतोडेर सोरोप चाबिल्ल्यान मरण आयलें. हे घडणुकेची नोंद घेवन सर्वोच्च न्यायालयान शुक्रारा सांजे वेळार डॉ. भाटीकार हांणी दाखल केल्ली विशेश अनुमती याचिका (एसएलपी) निकालांत काडली. न्यायमुर्ती विक्रम नाथ आनी न्यायमुर्ती संदीप मेहता हांच्या न्यायपिठा मुखार ह्या प्रकरणाची सुनावणी जाली.
याचिका दाखल करप्याक मरण आयिल्ल्यान ही मुख्य याचिका निकालांत काडिल्ली आसली तरीय ह्या प्रकरणा कडेन संबंदीत दुसरे एके याचिके वयली सुनावणी न्यायालयान जुलयांत निश्चीत केल्या.
हो पुराय कायदेशीर लडो फोंडें मतदारसंघाच्या लोकप्रतिनिधी कडेन जोडिल्लो आशिल्ल्यान ह्या प्रकरणाक राजकी आनी घटनात्मक नदरेन व्हड गांभीर्य लाबलां. फोंड्याचें तेन्नाचे भाजप आमदार रवी नायक हांकां मरण आयिल्ल्यान ही सुवात रिती जाल्ली आनी वेंचणूक आयोगान 9 एप्रीलाक थंय पोटवेंचणूक घेवपाची अधिसुचोवणी जारी केल्ली. मात, गोंय विधानसभेचो सध्याचो कार्यकाळ 14 मार्च 2027 ह्या दिसा सोंपता. म्हणल्यारूच उरिल्लो कार्यकाळ एका वर्सा परस उणो आशिल्ल्यान, गोंयांतल्या मुंबय उच्च न्यायालयान ही वेंचणूक रद्द केल्ली. लोकप्रतिनिधी कायद्या प्रमाण जर विधानसभेचो कार्यकाळ एका वर्सा परस उणो आसत जाल्यार पोटवेंचणूक घेनात, हो तर्क न्यायालयान मानून घेतिल्लो. कारण मे म्हयन्यांत निकाल लागले उपरांत वेंचून येवपी आमदाराक फक्त णव म्हयन्यांचो कार्यकाळ मेळपाचो.
उच्च न्यायालयाच्या ह्याच निर्णयाक काँग्रेसीचे उमेदवार आशिल्ले डॉ. केतन भाटीकार हांणी सर्वोच्च न्यायालयांत आव्हान दिल्लें. शुक्रारा फांतोडेर कर्नाटकांतल्या दांडेली सावन परत येतना तांकां सोरोप चाबलो आनी धारबांदोडें भलायकी केंद्रांत पावचे आदींच तांकां मरण आयलें. सर्वोच्च न्यायालयांत तांच्या मरणाची खबर वकिलान दिले उपरांत खंडपिठान मुख्य याचिका निकालांत काडली. मात, डॉ. भाटीकार हांचे वकील अभिषेक जेबराज हांणी मांडिल्लो युक्तिवाद न्यायालयान मान्य केलो. तातूंत तांणी कायदेशीर गजालींचेर सुनावणी घेवपाची मागणी केल्ली. ते प्रमाण, उरिल्ल्या एका वर्साच्या काळा खातीर पोटवेंचणूक घेवपाचे प्रक्रिये कडेन संबंदीत मुलभूत आनी घटनात्मक कायदेशीर मुद्द्यांचेर डॉ. भाटीकार हांचे याचिकेचेर वकिलांक जुलयांतले सुनावणेंत आपली सविस्तर मांडणी करपाची परवानगी न्यायालयान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
