भांगरभूंय | प्रतिनिधी
पक्षाचे कार्यकारिणी समितीच्या वांगड्यांचो खुलासो
भांगरभूंय । प्रतिनिधी
पणजी : रेव्ह्युलेशनरी गोवन्स पक्षाचे कार्यकरणी समितींत पक्षूच बंद उडोवपाचो निर्णय जाल्लो असो खुलासो आरजीपीचे संस्थापक वांगडी आनी कार्यकारिणी समितीच्या वांगड्यांनी केलो. पक्षाचे आमदार विरेश बोरकार हांकां विस्वासांत घेनातना जाल्ले बसकेंत पक्ष बंद उडोवपाक भोवमत आशिल्लें, पूण तेन्ना पक्षाचे अध्यक्ष मनोज परब हांणी हे विशीं भाश्य करूंक ना. आमकां पक्ष हो फुडे गेल्लो जाय, बंद जाल्लो नाका, अशी मागणी कार्यकारिणी समिती आनी संस्थापक वांगड्यांनी केल्या.
आरजीपींत सद्या मनोज परब आनी विरेश बोरकार हांचे मदीं चलिल्ल्या कोफुसावां विशीं अदीक उजवाड घालपा खातीर आरजीपीच्या वांगड्यांनी पणजे पत्रकार परिशद आपयली. ह्या वेळार आरजीपीचे कार्यकारिणी समितीचे वांगडी प्रेमानंद गावडे आनी कॅन्डीदो कोरीय्या तशेंच संस्थापक वांगडी प्रशांत पागी आनी विशाल देसाय हजर आशिल्ले.
सुरवेक आरजीपीन पर्यावरण आनी बिगर गोंयकारांचो विशय घेतिल्ल्यान 2019 त पक्षाक बरोच प्रतिसाद मेळ्ळो. दरेका रेव्ह्युलेशनरींनी आपलो काम वेवसाय सोडून आरजीची दुरदिश्टी घराघरांनी पावयली. हाचें फळ म्हूण आरजीपीक 10 टक्के मतांची टक्केवारी मेळ्ळी आनी विरेश बोरकार हे विधानसभेंत पावले, अशें पागी हांणी म्हणलें.
वेंचून आयले उपरांत विरेश हे अध्यक्षपदा वयल्यान देंवले आनी अध्यक्षपद मनोज परब हांचे कडेन दिलें. उपरांत मनोज हांणी पुराय पक्षाची समिती बदल्ली, पूण सद्या पक्षाची वर्सुकी साबार बसका घे नासतना सद्या कार्यकारी समिती ही सद्या सर्वोच्च जाल्या. ही समिती जें थारयता तेंच जाता आनी हे समितीन पक्ष बंद उडोवपाच्या घेतिल्ल्या निर्णयाक लागून आमकां धपको बसला, असो दावो पागी हांणी केलो.
फाटले दोन कार्यकारिणी समितीचे बसकेंत फक्त वांगड्यांक भायर मारपाचें काम जालां. फाटले बसकेंत ज्युलिएस आल्मेदा हांकां काडपाचो निर्णय जाल्लो देखून सांत आंन्द्रेचो ब्लॉक दुखावलो. हे विशीं विस्तारान चर्चा जावन समितीचे वांगडी मयुर आर्सेकार हांणी ज्युलिएस हांकां फोन करपाचो सल्लो परब हांकां दिलो. पूण परब हे फुर्योज जावन तांणी जुल्यिएस हाका भायर मारलो, अशें कार्यकारी समितीचे वांगडी प्रेमानंद गावडे हांणी सांगलें.
14 एप्रीला पयली जाल्ले कार्यकारिणी समितीचे बसकेंत हो पक्ष बंद उडोवपाची मागणी कांय समितीच्या वांगड्यांनी केली. पूण जे भुरगे गांवागांवांनी काम करतात तांचें कितें असो प्रस्न विचारून ह्या निर्णयाक आमी विरोध करून पक्ष बंद करचो न्हय आनी कोणाकूच काडचे न्हय अशी मागणी केली. पूण तांणी आमची मागणी नोटा म्हूण नोंद केली. समितींत हेर भुरग्यांनी चेपणा खाला येवन आवाज लेगीत काडूंक ना, असो आरोप गावडे हांणी केलो.
पक्षाची वाड जायना. भुरगे कामांत व्यस्त आशिल्ल्यान तांकां इत्सा ना अशें सांगून 20 वांगड्यां मदल्या 15 वांगड्यांनी पक्ष बंद उडोवपाक तेंको जाहीर केलो, अशें कार्यकारी समितीचे वांगडी कॅन्डीदो कोरेय्या हांणी सांगलें.
आमी 2027 ची वेंचणूक जाय मेरेन रावपाचो सल्लो दिलो. पूण भोवमतांचें मत मान्य जालें. हे बसकेक विरेश बोरकार हांकां आपोवक नाशिल्ले. हे विशींची कल्पना आमी बोरकार हांकां दिले उपरांत तांणी इतिवृत्तांत अहवाल मागयलो. पूण गोपनियतेचें कारण सांगून तांकां हो अहवाल दिवंक ना आनी उरफाटे तांचेर पक्ष विरोधी कारवायेचो ठपको दवरला, असो आरोप कोरेय्या हांणी केलो. पक्षा विशींचे निर्णय घेवपा खातीर कार्यकारिणी समितीक कसलोच हक्क ना. हे सारकिल्ले निर्णय पक्षाच्या मुळाव्या पांवड्यार जावपाक जाय. फाटलीं तीन वर्सां जाली पक्षाची वर्सुकी साबार बसका आपोवंक ना. ही साबार बसका बेगिनात बेगीन आपोवन कार्यकर्त्यांचें म्हणणें आयकून घेवचें, अशी मागणी कोरेय्या हांणी केली.
आरजी फुडें व्हरपाक जाय : विरेश बोरकार
आरजींत सगल्यांनी युनायटेड रावपाक जाय आनी आरजी फुडें व्हरपाक जाय. आमी सगले वांगडा आसात. आरोप खूब जाल्यात, पूण आमी तशें कांयच करूंक ना. फुडें पळोवया कितें जाता तें, अशी आरजीपींतल्या भितरल्या कोफुसांवांचेर आमदार विरेश बोरकार हांणी पयलीं प्रतिक्रिया दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
