भांगरभूंय | प्रतिनिधी
‘एनसीआरबी’च्या प्रिझन स्टॅटिस्टिक्स इंडिया अहवालांतली म्हायती
भांगरभूंय । प्रतिनिधी
पणजी : एका वर्साच्या काळांत कोलवाळ बंदखणींत 18 ते 30 वर्सां पिराय गटांतल्या कैद्यांचे संख्येंत 2.14 टक्क्यांनी वाड जाल्या. डिसेंबर 2023 च्या निमाणे मेरेन हे बंदखणींत वट्ट कैद्यां मदले 31.62 टक्के कैदी हे 18 ते 30 वर्सां पिराय गटांतले आशिल्ले. डिसेंबर 2024 च्या निमाणे मेरेन ही संख्या वाडून 34.03 टक्के जाली. तातूंत ख्यास्त जाल्ले तशेंच खटलो चालू आशिल्ल्या कैद्यांचो आस्पाव आसा. राष्ट्रीय गुन्यांव नोंदणी विभागाच्या (एनसीआरबी) प्रिझन स्टॅटिस्टिक्स इंडिया ह्या अहवालांतल्यान ही म्हायती मेळ्ळ्या.
अहवाला प्रमाण, कोलवाळ बंदखणींत डिसेंबर 2023 च्या निमाणे मेरेन ख्यास्त जाल्ले 95 जाल्यार खटलो चालू आशिल्ले 476 कैदी आशिल्ले. तातूंतले 179 कैदी 18 ते 30 वर्सां पिराय गटांतले आशिल्ले. 330 कैदी (58.30 टक्के) हे 30 ते 50, जाल्यार 57 कैदी (10.07 टक्के) हे 50 वर्सां पिराये वयले आशिल्ले. तुळेंत डिसेंबर 2024 च्या निमाणे मेरेन 30 ते 50 वर्सां पिराय गटांतल्या कैंद्यांची संख्या उणी जाली, जाल्यार 50 वर्सां पिराये वयल्या गटांतल्या कैद्यांची संख्या वाडली. डिसेंबर 2024 च्या निमाणे मेरेन हे बंदखणींत वट्ट 614 कैदी आशिल्ले. तातूंतले 95 हे ख्यास्त जाल्ले जाल्यार खटलो चालू आशिल्ले 519 कैदी आशिल्ले. डिसेंबर 2024 च्या निमाणे मेरेन वट्ट कैद्यांतले 327 (53.25 टक्के) 30 ते 50 वर्सां पिराय गटांतले जाल्यार 78 कैदी (12.70 टक्के) हे 50 वर्सां पिराये वयले आशिल्ले. वयल्या काळांत कोलवाळ बंदखणींत थळाव्या कैद्यांचे संख्येंत उणाव जाला, जाल्यार हेर राज्यांतल्या कैद्यांची संख्या वाडल्या. डिसेंबर 2023 च्या निमाणे मेरेन हे बंदखणींत वट्ट 566 मदले 228 कैदी (40.28 टक्के) हे थळावे आशिल्ले, जाल्यार 249 कैदी (43.99 टक्के) हे दुसऱ्या राज्यांतले आशिल्ले. डिसेंबर 2024 च्या निमाणे मेरेन वट्ट 614 कैद्यां मदले 226 थळावे (36.80 टक्के) जाल्यार 287 (46.74 टक्के) दुसऱ्या राज्यांतले आशिल्ले, अशें अहवालांत नमूद केलां.
विदेशी कैद्यांचे संख्येंत किरकोळ वाड
डिसेंबर 2023 च्या निमाणे मेरेन कोलवाळ बंदखणींत वट्ट कैद्यां मदीं 89 विदेशी नागरीक आशिल्ले. डिसेंबर 2024 च्या निमाणे मेरेन वट्ट कैद्यांतले 101 कैदी विदेशी आशिल्ले. एका वर्सांत विदेशी कैद्यांची संख्या 0.72 टक्क्यांनी वाडल्या अशें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
