भांगरभूंय | प्रतिनिधी
खंयचेंय सरकारी कार्यालय जशें आसता, तशेंच हें शिक्षणखात्याच्या संचालकाचें पर्वरेचें ऑफीस. संचालिका सौ शरयू प्रभूदेसाय (पूर्वाश्रमी शरयू जोशी) तिगेल्या पालवी लोकां वांगडा आशिल्ली बसका सोंपोवन तिगेल्या कार्यालयांत पाविल्ली. तिगेल्या पालवी कडेन ती फुडल्या वर्साच्या पाठ्यपुस्तकां विशीं भासाभास करताली तेन्नाच थंयचो टेबलावेलो फोन वाजलो.
“आगो शरयू, हांव रेखा. तुका आज एक आमंत्रणपत्र मेळ्ळां?” रेखा (लग्ना पयलीं रेखा साळकार) शरयूची इश्टगत ल्हानपणांतल्यान.
“हांव आतांच एक म्हत्वाची बसका सोंपोवन ऑफिसांत पावलां. अजुनय टपाल चाळपाक पावलेंना. पूण ते पत्रिके संबंदी तूं इतलें काचाबूल कित्याक गो रेखा? सांग कितें स्पेशल खबर?”
“तूं टपाल पयलीं पळय. तातूंत इंद्रधनूश्यी रंगाचो लाखाटो कुरियरान आयिल्लो आसा जाल्यार सांग.”
“एक मिनिट, हें आसा; ताचें कितें? कोणालें तरी व्होंवळीकपत्र आसत.”
“तातूंत आमकां बारा मे दिसा बसके खातीर हॉटेल वीडी इंटरनॅशनल, कोलबण व्हिलेज, सासष्टी, गोंय राज्य हांगां आपयलां. सकाळच्यान अकरापसून आयल्यार जाता पूण रात आनी दीस रावपाच्या तयारेन येयात अशेंय फुडें म्हळां. तुमगेल्या समस्त पोरण्या इश्ट, इश्टीणींक एकठांय मेळपाची निमाणी संद अशेंय तातूंत म्हळां. मात कोणें पत्रिका धाडल्या ताचें नांव ना. कोणें धाडल्या आसत गो?”
” आमगेले बरे मागपी कॉलेज टिमांतले वा इस्कोलांतले आमिग अशो इश्टांच्यो बसका करपाची नवी कार्यपद्दत प्रचलीत दिसांनी चालू जाल्या. तू वतलें ?”
“म्हजें भितरलें मन म्हणटा वचया म्हण. हे पिरायेंत तितलीच मौजमजा. आनी कोणेंतरी फकाणां केल्लीं आसत जाल्यार ‘मार्टीन कोर्नर’ हॉटेलांत दनपारचें जेवण घेवन परत घरा. तूं येता मगो?”
“सांगतां; तुजे बशेन मन सांगता तशें तात्काळ थारावपाक म्हाका मेळना. त्या दिसाची कार्यावळ कितें तें पळोवपाक जाय. नोकरी करतां हांव; निवृत्त जावपाक अजून दोन वर्सा आसात म्हाका. आतां बासशट्ट पिराय केल्या सरकारान आमी ऑफिसरांच्या सेवानिवृत्तीक.”
“अजून म्हयनो आसा 12 मायाक. वेळ काडून येवपाचें थाराय. वाट पळयतां.” रेखान फोन दवरलो.
जी दशा रेखा आनी शरयूली जाल्ली तीच दशा वास्को शारांत नाथ लोटलेकारा वांगडाय जाल्ली. तो स्वातंत्र्यपथावेल्या ताच्या टक्क आरामशीर कार्यालयांत तागेलें नव्या घडणावळीचे दागिने पळयतालो. तागेली विश्वगुरू ज्वेल्हर्सच्यो शाखो फकत वास्को शारांतच न्ही तर गोंयच्या सगळ्या शारांनी पसरिल्ल्यो. बापायलें भांगराचे दागदागिने करपाचें कार्य ताणें कितल्यातरी पटीन वाडयलेलें आनी ताका कॉर्परेट स्वरूप दिल्लें. तागेल्या मॅनेजरान एक इंद्रधनूश्यी लाखाटो ताचे कडेन दिलो. “आतांच कुरियर सर्विसेंतल्यान आयला, सर.”
तो लाखाटो आनी भितरलो विशय वाचून ताका अजाप दिसलें. “१२ मे दिसा खंयचो वार आनी त्या दिसा म्हजी कार्यावळ कितें?” कळाव करनास्तना ताणें मॅनेजराक विचारलें.
“शेनवार, सर. आनी कार्यावळ अजून थारायलेली ना. एक म्हयनो आसा त्या दिसाक.”
“तशें आसत जाल्यार खंयचें कार्य 12 आनी 13 मेक दवरनाका.” गुरूनाथ लोटलीकारान बसकेंत वचपाची थारवणे तागेल्या सभावाप्रमाण वेळ लायनास्तना निश्चित केल्लें.
मध्यपूर्वेंत दुबाय देशांत दामू परुळेकाराली अवस्था तीच जाल्ली. मात तागेलें येवप विमानाची तिकेट मेळपाचेर आशिल्लें. रोखडोच फोनार ताणें 11 मेक गोंय वचपाच्या विमान तिकेटीची तजवीज केली. मुंबयंत अनील काकोड्याक तो प्रस्न आयलोना. मुंबय आनी गोंय दोनी कडेन तागेली म्हाल येरादारीचीं कार्यालयां. खंयच्याच ट्रकान ताका गोंया वचप सोंपें. पूंण ह्यावेळार ताणें मर्सेडीस कार व्हरपाचे थारायलेलें.
अवधूत नायक हैद्राबाद कडल्या वखदांच्या कंपनींतल्यान विक्री संचालक पदावेल्यान निवृत्त जाल्लो. त्याच कंपनीची आनीक थोडो तेंप तांचे खातीर काम करपाचो प्रस्ताव खेरीज विंगड वखदाच्या कंपन्यांच्यो तसल्लीच सुचोवणी सोडून तो गोंयांत सुशेगाद रावतलो या दृश्टीकोनांतल्यान आयिल्लो. पस्तीस वर्सांच्या नोकरी केले उपरांत ताका नोकरी करपाचो हावेस उरूंक नासलो. ताणें मडकय गांवांत दायज मेळिल्ल्या पोरण्या घराक नवें बळगें दिल्लें. गोंयचो आसूनय ताका कोलबण गांवचे आनी हॉटेलाचे नांव पयल्याच फावट आयकल्लें. पूण गुगल नकाश्यां वेल्यान तो थंय सहजपटी पावंक शकता ही गजाल तो जाणा आशिल्लो. मात बसका खरीच आसतली काय कोणेंतरी फकाणां केल्यांत हाचे विशीं दुबाव आशिल्ल्यान कोलबण वचप येवप ताणें एक पासय जातली अश्या थारावणेर केल्ली. नायजाल्यार मडकय सारक्या गांवांत एकतर पुस्तकां वाचप आनी नवदुर्गेच्या देवळांत भजन किर्तन आयकप याबगर वेळ घालोवपाक दुसरी वेवस्था नाशिल्ली.
एनआयओ कॉलनी दोनापावल पणजेंत सुधाकर भट गोंयचीं तळीं, तलाव आनी बांय ह्या विशयाचेर अहवाल तयार करतालो. एनआयओंतल्यान निवृत्त जातकर ताचे कडेन गोंय सरकारान ही कामगिरी दिल्ली. उत्तर गोंयचे परिक्षण तयार जाल्ले मात दक्षिणेकडची ताका जाय ती म्हत्वाची म्हायती अजुनय थंयच्या टीमीन धाडलेल्ली नासली. णव, धा आनी अकरा मे तीन दीस आपूणच ते काम करप आनी बाराबोर कोलबण वचप अशें ताणें थारायलें. बसका आसल्यार रावपाचें ना जाल्यार दोनापावल परतुपाचें ताणें चिंतलें.
उल्का पंडीत (आधले उल्का शेटये) नाशकात फॅमिली डॉक्टर म्हण प्रॅक्टीस करतालें. तागेलो घोव विवेक एका व्हड लगेज कंपनींत डायरेक्टर आशिल्लो. ह्या वर्सा परदेश सोडून खूब तेपान मे म्हयन्याची सुटी गोयांत घालोवया या निर्णयाचेर ताणें कोलबणच्या हॉटेलाक 12 मे दिसा भेट दिवपाचे थारायले.
बीजेटीआय कॉलेजांतल्यान निवृत्त जातकर अजून थंय भेट दिवपी प्रोसोर इंजनेर सी एम एन कंटक (पूर्वाश्रमी मालन रेगे) हाणेंय तोच थाराव केल्लो. ताचो घरकार आब्रिल आनी मे हे दोन म्हयने अमेरिकन युनिवर्सिटींत व्याख्यान दिवपाक वचपाचो आशिल्यान ताचें काम खूब सोंपें जाल्ले. पूण प्रश्न तागेल्या हुनाळी सुटी लागिल्ल्या नातरांचो आशिल्लो. मात चलो आनी सुनेन व्हड मनान या वर्सा आमी मुंबय शारांत राबता तू गोंयां वचून यो अशें सांगिल्ल्यान तिचें काम सोंपें जाल्लें.
बंगलोरा मात डॉ आशा रंगनाथन न्ही केरकार हिचो मानसीक गोंधळ केन्नायतरी सोंपतलो अशें दिसनासलें. कर्नाटक राज्यांतच न्हय तर आख्ख्या देशांत अतिम्हत्वाचे दोळ्यां दोतोर म्हूण ख्याती मेळयलेल्या रंगनाथन दांपत्याची समस्याच वेगळी. तांचे कडेन वेळ ही वस्त नाशिल्ली. दीस आनी रात ओपेरासांब, पेशंट आनी हॉस्पिटल हातूंत वेळ कसो धांवता हाची तांका खबर लेगीत नासली. दनपारचें जेवण तांचे खातीर एक व्हड धडणूक. हे परिस्थितींत 12 आनी 13 मे हे दोन ते बगर दोन दीस बंगलोर गोंय येवप वचप अशे चार दीस तांचे खातीर निखालस संकट पूण देव दर फावट गरजेवंतांक पालव दिता हाचो अणभव तांका आयलो. ताचें जालें अशें; तांचो पूत आनी सून दोघीजाण तांच्या बशेन दोळ्यां दोतोर, पूण प्रॅक्टिस करताले अमेरिकेंत. तांणी तांगेल्या शाळेंत वचपी भुरग्यांक पडिल्ल्या हुनाळी सुटयेंत ह्या वर्सा भारतांत येवपाचें थारायलेलें. तांणी तशें हांकां आब्रिल म्हयन्यांत कळयलेलें. हांचे खातीर ते देवान धाडिल्लें व्हड बेसांव. तातूंत दिसां खातीर एका आयटी कंपनीच्या डायरेक्टरान तागेलें हॅलिकोप्टर वापरपाक दिवपाचें थारायल्यान तोय प्रश्न सहजपटी सुटलो.
2007 त संवसारांत माय मयन्यांतल्या बारा तारखेर आनी अकरा वरांचेर विंगड सुवातीवेल्यान आयिल्ले आनी पन्नास वर्सां पयलीं वास्को शारांत धर्मशाळेंतल्या मुळावी मराठी शाळेंत वांगडा शिकिल्ले आनी ते तेपार संवसाराकडे विस्मय आनी अजापान पळोवपी अणुभवी ल्हान भुरगीं आतां परिपक्व अणभवी आनी बुदवंत जेश्ट नागरीक म्हूण एकठांय जाल्लीं.
दीपक पाणंदीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
