भांगरभूंय | प्रतिनिधी
पणजी : सोरोप चाबिल्ल्यान मरण आयिल्ले डॉ. केतन भाटीकार हे बरे फिजिओथेरापिस्ट तशेच बरे सामाजीक वावुरपी आशिल्ले. सक्रीय राजकारणांत पावल दवरून आमदार, मंत्री जावपाचें तांचें सपन आशिल्लें. नियतीन आमदार जावपाचें सपन दोन फावटीं झोमून घेतले उपरांत निमणो नियतीनूच तांचो घात केलो. आमदारकीचो राजयोग झोमून घेतले उपरांत तांची जीण लेगीत नियतीनूच सोंपयली. आमदार, मंत्री सोडूच नियतीन तांचें अस्तित्व पुसून उडयलें.
डॉ. केतन भाटीकार हे दोतोर आशिल्ले. दुयेंतींचेर उपचार करपा सयत ते समाजीक वावर लेगीत करताले. कोविडा वेळार तांणी फोंडें मतदारसंघांतल्या खूबश्या लोकांक मजत केल्या. हाका लागून 2022 चे विधानसभा वेंचणुकेंत मगो पक्षान तांकां उमेदवारी दिली. भाजपाचे सर्गेस्त रवी नायक, काँग्रेसीचे राजेश वेरेंकार आनी मगोचे डॉ. केतन भाटीकार हांचे मदीं तिरंगी लडत जाली. हे तिरंगी लडतींत सुरवेक भाजपाचे रवी नायक फकत एका मतान जैतिवंत जाले. जैता मदलो फरक सामको उणो आशिल्ल्यान फेरमतमेजणी जाली. हातूत डॉ. भाटीकार 70 मतांनी हारले. जैताच्या लागीं पावून लेगीत तांकां जैत मेळ्ळें ना. हाका लागून आमदार जावपाचें तांचें सपन भंगलें.
फोंडेंचे आमदार आनी मंत्री रवी नायक हांकां 15 ऑक्टोबर 2025 ह्या दिसा मरण आयिल्ल्यान फोंडें मतदारसंघा खातीर पोटवेंचणूक घेवची पडली. मगो पक्ष सरकारांत आशिल्ल्यान तांकां भाजप उमेदवाराक तेंको दिवचो पडलो. मगोची उमेदवारी मेळपाची शक्यताय नाशिल्ल्यान डॉ. केतन भाटीकार हांणी काँग्रेसींत प्रवेश केलो. काँग्रेसीची तांकां उमेदवारी मेळ्ळी. तांचो प्रचार नेटान चालू आशिल्लो. डॉ. केतन भाटीकार हांकां सगळी कडेन बरो प्रतिसाद मेळटालो. मात आदल्या दिसा उच्च न्यायालयान फोंडें पोटवेंचणूक रद्द करपी आदेश दिलो. मतदान 9 एप्रीलाक जावपाचें आशिल्लें आनी उच्च न्यायालयान 8 एप्रीलाक निकाल दिलो. हाका लागून आमदार जावपाचें तांचें सपन दुसरे खेपे भंगलें. आता वर्सा भीतर विधानसभा वेंचणूक जावपाची आसा. पोटवेंचणूक रद्द करपी उच्च न्यायालयाच्या आदेशाक सर्वोच्च न्यायालयात आव्हान दिवपा सयत वेंचणुकेची तयारी तांणी सुरू केल्ली. तयारी सुरू आसताना सर्पदंशाक लागून शुक्रारा फातोडेर तांची प्राणज्योत पालावली. नीयतीन तांचे जीवित सोपयले आनी आमदार, मंत्री जावपाचे तांचे सपन अपूर्ण रावलें. नियतीक लागून कोणाक राजयोग मेळत वा कोणाचो राजयोग वचत, ताचो अदमास करप अशक्य आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
