भांगरभूंय | प्रतिनिधी
पणजी : रिव्होल्युशनरी गोवन्स पार्टी (आरजीपी) भितरलें कोफुसांव आनीक वाडलां. पक्षाचे फुडारी आनी पदाधिकार्यां मदलें शाब्दीक झूज बरेंच आक्रमक जावपाक लागलां. भांडारी अजय खोलकार हांणी फेसबुकाच्या माध्यमांतल्यान आमदार विरेश बोरकार हांचेर सामक्या सुचक उतरांनी टिका केली. सांत आंद्रेंत फकत सायलंट ऑर्चडूच न्हय, तर एक सायलंट मनिसूय आसात! अशें म्हणीत खोलकार हांणी आमदार बोरकार हांच्या शांत रावपाचे भुमिकेचेर टिका केली. इतलेंच न्हय, तुमच्या कथीत शांतिकायेचें तोंड पडलां, अशें म्हणीत तांणी आझाद मैदानाचेर परत 39 (अ) चो लढो सुरू करपाचे संकेत दिले. ह्या पोस्टाक पक्षाध्यक्ष मनोज परब हांणी ‘आमी येता, तयार राव!’ अशें म्हणीत फाटबळ दिल्ल्यान पक्षांतली फूट आतां उक्तडार आयल्या.
हो वाद कांय दिसां आदीं आगशेचे पंच ज्युलिअस आल्मेदा हांचेर जाल्ल्या कारवायेक लागून सुरू जाला. आल्मेदा हे आमदार विरेश बोरकार हांच्या सामके लागींचे मानतात. हे कारवाये उपरांत आरजीपींत दोन गट जाल्ल्याचें चित्र निर्माण जालें. सुरवातेक आमदार बोरकार हांणी पक्षांत ‘सगलें आलबेल’ आशिल्ल्याचें सांगून पत्रकारां कडेन उलयतना ह्या विशयाचेर आनीक उलोवपाचें न्हयकारिल्लें. मात मंगळारा मनोज परब हांणी सोशल मिडियाचेर सेंट लॉरेन्सच्या जिल्हो पंचायत वांगडी तृप्ती बकाल, आदित्य देसाय आनी लिसियो रोन्कोन हांचे सयत हेर पदाधिकार्यांचेर सरळ टिका केली. हे टिकेक जाप म्हणून विरेश बोरकार हांणी बुधवारा रातची फक्त ‘पीस’ (शांतता) अशी पोस्ट केली. मात, दुसर्याच दिसा सकाळीं मनोज परब हांणी ‘वाटाण्याचे इमोजी वापरून ’सायलंट कावर्ड मॅच्युरिटी’ असो हॅशटॅग लायत बोरकर हांकां रिप्लाय दिलो.
पक्षांतलो हो वाद आतां फकत फुडार्या पुरतो मर्यादीत उरा नासतना सरचिटणीस आनी कार्यकर्त्यां मेरेन पावला. सरचिटणीस विश्वेश नायक हांणी मनोज परब हांची बाजू घेतिल्ल्यान, आमदार बोरकार हांकां येवपी बसकेक हाजीर रावपाचो उलो मारलो. नायक हांणी आमदारांच्या समर्थकांचेर ’स्लो पॉयझनिंग’ केल्ल्याचो आनी बनावट फेसबूक पेजी चलोवन फुडार्यांची बदनामी केल्ल्याचो आरोप केलो. दुसरे कडेन, आमदार विरेश बोरकार हांच्या ‘सांत आंद्रे ब्लॉक’न मनोज परब आनी अजय खोलकार हांच्या विधानाचो खर निशेध करपी अधिकृत पत्रक जारी केलां. जे मेरेन हे मतभेद सोंपनात ते मेरेन आमदारांनी कार्यकारिणीचे बसकेंत वयचें न्हय, अशीय मागणी त्या ब्लॉकान केली.
सध्या आरजीपी मदलें हें वयक्तीक झूज चिखल मारपा मेरेन पावलां. सोशल मिडियाचेर कार्यकर्त्यांनी एकामेकांक वायट उतरां दिवपाक सुरवात केल्या आनी मनोज परब हांच्या वैयक्तीक जिणेचेरूय हल्लो जावपाक लागला. परिस्थिती इतली गंभीर जाल्या, आतां दोनूय गट कायदेशीर सल्लो घेवपाक लागल्यात आनी पक्षाचेर नियंत्रण दवरपा खातीर वकिलांचो आदार घेतात. देड म्हयन्या सावन आमदार पक्षाच्या कार्यकारी मंडळा कडेन संपर्कांतल्यान भायर पडल्यात आनी ही फूट आतां गोंयच्या राजकारणांत आरजीपीच्या अस्तित्वा विशीं प्रस्न उपस्थीत करता. मजगतीं, हो वाद सोडोवपा खातीर आमी सगले यत्न करतात अशें आरजीपी कार्यकारी समितीच्या पदाधिकार्यांनी सांगलें. पूण आमदार बोरकार तांकां जाप दिना. फाटल्या देड म्हयन्यांत आमदार बोरकार हांणी पक्षाच्या कार्यकारी मंडळा कडेन संपर्क पुरायपणान तोडला. ताका बसकेक आपोवपा खातीर व्हॉट्सअॅप आनी ईमेलाचेर जायत्यो मेसेजी धाडले. पूण ताणें ताका जाप दिवंक ना. ह्या सप्तकांत कार्यकारी बसका जातली. बोरकार हांकां हे बसकेक आपयला. बसकेंत तडजोड जातली अशी आस्त आमी बाळगितात अशें पदाधिकार्यांनी सांगलें. आरजीची फुडली वाटचाल खंयचे दिशेन जातली, हें पळोवपाची सध्या उमळशीक वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
