भांगरभूंय | प्रतिनिधी
पणजी : डॉ. केतन भाटीकार हे केन्नाच आमदार जरी जाले नात तरी फोंडें मतदारसंघांत दोन खेपो ते उमेदवार आसले. २०२२चे वेंचणुकेंत सर्गेस्त रवी नायक हांंकां तांणी खर झुझ दिली. पोटवेंचणुकेंतूय तांकां व्हड प्रतिसाद मेळटालो मात आदले दिसा पोटवेंचणूक रद्द जाली. पोटवेंचणुकेंतल्या उमेदवारीक लागून ते बरेच फामाद जाले. हाचो परिणाम म्हूण मुख्यमंत्री आनी थळाव्या फुडार्यांसयत राष्ट्रीय मळावेल्या फुडार्यांनी लेगीत तांकां आर्गां ओपल्यां.
कॉंग्रेसीचे राष्ट्रीय अध्यक्ष मल्लिकार्जुन खर्गे, फुडारी राहूल गांधी, आपचे राष्ट्रीय संयोजक अरविंद केजरीवाल तशेंच केरळचे राज्यपाल राजेंद्र आर्लेकार हांणी दुख्ख उक्तायलां. कॉंग्रेसी सयत हेर पक्षांच्या फुडार्यांनी लेगीत दुख्ख उक्तायलां.
डॉ. केतन भाटीकार हांच्या मरणाक लागून म्हाका बरेंच दुख्ख जाता. नामनेचे फिजीओथेरापिस्ट आशिल्ले डॉ. भाटीकार हांणी उपचार करपा सयत सामाजीक वावर लेगीत केलो, अशें राहूल गांधी हांणी म्हणलां.
कॉंग्रेसीचे राष्ट्रीय अध्यक्ष मल्लीकार्जुन खर्गे
डॉ. केतन भाटीकार हांच्या मरणान राजकारण तशेंच वैजकी वाठाराचें लुकसाण जालां, अशें कॉंग्रेसीचे राष्ट्रीय अध्यक्ष मल्लीकार्जुन खर्गे हांणी म्हणलां.
राष्ट्रीय संयोजक अरविंद केजरीवाल
डॉ. केतन भाटीकार हांच्या मरणान गोंय एका बर्या दोतोराक, समाजीक वावुरप्याक आनी राजकारण्यांक मुकला. फकत फोंडें वाठारांत न्हय जाल्यार पुराय गोंयांत तांकां मान आशिल्लो, अशें आपचे राष्ट्रीय संयोजक अरविंद केजरीवाल हांणी म्हणला.
केरळचे राज्यपाल राजेंद्र आर्लेकार
डॉ. केतन भाटीकार हांचें आचकीत मरण धपको दिवपी आसा. समाजीक वावर करपी आनी राजकारणाची व्हड सपना पळोपी इश्ट आमचेमदीं ना, हें वास्तव स्वीकारपाक बरेंच जड जाता, अशें केरळचे राज्यपाल आनी गोंयचे सुपूत राजेंद्र आर्लेकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
