भांगरभूंय | प्रतिनिधी
केरी-सत्तरी: रावण- सत्तरीच्या रामचंद्र सोमा गांवस हांच्या गोठ्या शेजराक सांठोवन दवरिल्ल्या तणाक उजो लागून व्हड अर्थीक लुकसाण जाल्ल्याची घडणूक घडली.
रामचंद्र गांवस हे दूध डेअरी वेवसा वांगडा भात, शेती आनी काजू उत्पादनाचे आपल्या कुटुंबाचें पोट चलयता. तांचे कडेन सुमार २० म्हशी आसात. जनावरांच्या चार्या खातीर तांणी भात कापणी उपरांत सुमार सात ट्रक तण सांठोवन दवरिल्लें. मात अचकीत लागिल्ल्या उज्यांत पुराय तण लासून गोबोर जालें.
उजो लागिल्ल्याचें समजतांच रामचंद्र गांवस आनी थळाव्यांनी उजो पालोवपाचो यत्न केलो. मात हातूंत तांकां येस येवंक ना. दरेका तणाच्या ट्रकाची किंमत ८ हजार रुपया आशिल्ल्यान हे घडणुकेंत सुमार ६० ते ७० हजार रुपयांचें लुकसाण जाल्ल्याचो अदमास उक्तायला.
सध्या ह्या वाठारांत तणाचो उणाव आशिल्ल्यान जनावरां खातीर परत तण एकठांय करप ह्या अशेतकारा खातीर कठीण आसा. हाका लागून ते व्हड अर्थीक संकश्टांत सांपडल्या. ह्या कुटुंबाचो मुखेल डेरी वेवसायाचेर परिणाम जावपाची शक्यताय आसा.
केरी ग्रामपंचायतीची सरपंच नंदिता गांवस तशेंच थळाव्या पंचांनी घडणुके सुवातेर भेट दिवन पळोवणी केली. ह्या वेळार तांणी संबंदीत कुटुंबाक आस्वासन दिवपाचें उतर दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
