भांगरभूंय | प्रतिनिधी
पणजीः बंगालच्या खाडींतलो उण्या दाबाचो पट्टो आनी हेर वातावरणीय बदलांक लागून आयच्यान पांच दीस राज्यांत पावस पडपाची शक्यताय हवामान खात्यान उक्तायल्या. १५ ते १७ मे मदीं गडगड आनी वीज पडपाची शक्यताय आशिल्ल्यान ह्या तीन दिसां खातीर एलो अलर्ट जारी केला. आयतारा रातीं आनी शुक्रारा सकाळीं राज्यांतल्या कांय वाठारांनी पावसाची नोंद जाल्या. कांय कडेन पडझडीची नोंद जाली. शुक्रारा दीसभर दमट आशिल्ली.
राज्यांत चोवीस वरांनी सरासरी ३.७ मिलिमीटर पावसाची नोंद जाली. धारबंदोड्यां १२.३ मिमी, जाल्यार सांखळे ४.८ मिमी पावस पडलो. राज्यांत १ मार्च ते १५ मे मजगतीं सरासरी १३.१ मिमी पावसाची नोंद जाल्या. अंदूं मान्सूनपूर्व पावसाचें प्रमाण ३५ टक्क्यांनी वाडलां. शुक्रारा राज्यांतल्या तापमानांत वाड कायम आशिल्ली. पणजे चडांत चड ३६.२ अंश आनी उण्यांत उणें २६.४ अंश सेल्सियस नोंद जाला. मुरगांवांत चडांत चड तापमान ३५.८ अंश आनी उण्यांत उणें तापमान २५ अंश उरलें.
फुडल्या स दिसां खातीर राज्यांत चडांत चड तापमान ३४ ते ३६ अंश आनी उण्यांत उणें तापमान २६ ते २७ अंश सेल्सियस मदीं आसतलें असो अदमास हवामान खात्यान उक्तायला. २९ ते २१ मे ह्या काळांत राज्यांतलें हवामान सुकें उरपाची शक्यताय आसा. वातावरण बरें आशिल्ल्यान मान्सून फुडल्या २४ वरांनी अंदमान बेटार पावपाची शक्यताय आसा. हवामान अनुकूल उरल्यार ४ जून मेरेन पावस गोंयांत पावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
