भांगरभूंय | प्रतिनिधी
पणजी : गोंयच्या वैजकी आनी राजकीय मळार एक सामकें आस्वासक व्यक्तीमत्व म्हणल्यार डॉ. केतन भाटीकार. खेळां मैदाना सावन जनसामान्यांत जांचें नांव आदरान घेताले त्या डॉ. भाटीकर हांच्या जिवीताचो प्रवास आयज सोंपलो. दांडेलीच्यान गोंयांत परततना अनमोड घांटार घडिल्ले एके दुर्दैवी घडणुकेन गोंयच्या राजकारणांतलो ’स्पार्क’ कायमचो पालवलो. हाका लागून पुराय राज्याचेर दुख्खाची सया पातळ्ळ्या.
एक योगायोग असोय: १५ म्हयने, १५ तारीख, ३ फुडारी
आदले आमदार लवू मामलेदार हांची १५ फेब्रुवारी २०२५ तारखेर खून जालो. उपरांत, शेतकी मंत्री रवी नायक हांकां १५ ऑक्टोबर २०२५ दिसा काळजाच्या आताकान मरण आयलें. आतां कॉंग्रेस फुडारी डॉ. केतन भाटीकार हांकां १५ मे २०२६ तारखेर सोरोप चाबिल्ल्यान मरण आयलें. फाटल्या १५ म्हयन्यांनी फोंडें मतदारसंघांतल्या ३ फुडार्यांक १५ तारखेकूच मरण आयलें. हो फकत एक विचीत्र योगायोग.
उपलब्ध म्हायती प्रमाण, डॉ. भाटीकार आनी तांचे सहकारी, इश्ट सुशांत कवळेंकार बिरेस्तारा मध्यानेर दांडेलीच्यान गोंयचे दिकेन गाडयेन घरा येताले. लघुशंके खातीर अनमोड घांटार गाडी उबी केली तेन्ना, डॉ. भाटीकार सकयल देंवले. हाचे मजगतीं ताचो मोबायल फोन सकयल पडलो आनी तो उखलपा खातीर ते बागवले तेन्ना तांकां सोरोप चाबलो. तांचे वांगडा आशिल्ले कवळेकार हांणी दिल्ले म्हायती प्रमाण, त्या वेळार ह्या वाठारांत पावस सुरू आशिल्लो आनी दाट चिखलाक लागून खुबशीं आडमेळीं येतालीं. रेंज नाशिल्ल्यान संपर्क करप कठीण जाल्लें. आपले हात- पांय थंड पडिल्ले, कांयच सुचनाशिल्लें.. अश्या शब्दांनी ताच्या सहकाऱ्यायांनी ते रातचें तें भिरांकूळ चित्र मांडलें. मागीर तांणी अॅम्ब्युलन्स मागयली, ती येता म्हणसर दुसरी अॅम्ब्युलन्स मागयली. मध्यानरातीं सुमार ३:३२ वरांचेर भाटीकार हांकां १०८ एम्बुलन्सींतल्यान धारबांदोडें भलायकी केंद्रांत हाडले, मात तो मेरेन तांकां मरण आयिल्लें.
वैजकी ‘एक्स्पर्ट’ ते राजकारणांतले ’बुलंद आवाज’
डॉ. भाटीकार हे फकत एक राजकारणी न्हय, तर ते आघाडेचे फिजिओथेरपिस्ट आशिल्ले. ऑर्थोपेडिक आनी स्पोर्ट्स फिजिओथेरपींत पद्व्युत्तर पदवी घेतले उपरांत तांणी फोंडें आनी मडगांवां ’स्पार्क’ ह्या नांवान फिजिओथेरेपी क्लिनिक्स सुरू केल्लें. लंडनाक एक्वेटिक थेरपीचें प्रशिक्षण घेतिल्ले ते गोंयच्या मेजक्याच तज्ञां मदले एक. गोवा रणजी संघ, गोवा क्रिकेट असोसिएशन आनी २०१५ च्या फुटबॉल युनिटी वर्ल्ड कपांत तांणी म्हत्वाच्यो जापसालदारक्यो घेतिल्ल्यो. ’फिजिओ युथ आयकॉन’ आनी ’क्लिनिकल एक्सलन्स’ अश्या जायत्या राष्ट्रीय पुरस्कारांनी तांचो भोवमान जाल्लो.
राजकी कारकीर्द आनी अपुर्ण सपन
डॉ. भाटीकारांनी आपली राजकी कारकीर्द २०१७ वर्सा गोंय सुरक्षा मंच ह्या पक्षांतल्यान सुरू केली. भारतीय भाशा सुरक्षा मंचच्या माध्यमांतल्यान तांणी पणजेची वेंचणूक लढोवन सगल्यांचें लक्ष ओडून घेतिल्लें. २०२२ च्या विधानसभा वेंचणुकेंत तांणी महाराष्ट्रवादी गोमंतक पक्षा वतीन लढटना तांणी भाजपाचे दिग्गज फुडारी रवी नायक हांकां खर झूज दिल्लें. फकत ७७ मतांच्या फरकान ते हारिल्लें. रवी नायकांचें मरण आनी हालींच जाल्ल्या राजकी घडामोडीं उपरांत तांणी कॉंग्रेस पक्षांत प्रवेश केल्लो. फोंडें पोटवेंचणुके खातीर ते पक्षाचे बळीश्ट उमेदवार मानताले. तांणी फोंडेकार हे केंद्रबिंदू मानून फाटल्या सात वर्सां सावन लोकां खातीर फुकट एम्बुलन्स आनी आपत्ती वेवस्थापन गट सक्रीय दवरिल्लो.
विधानसभेचें सपन पुराय जावंक ना
आमदार जावन फोंडेचें चित्र बदलप आनी तरणाट्यां खातीर रोजगाराच्यो संदी निर्माण करप हें डॉ. भाटीकार हांचें सपन आतां अर्धकुटें उरलें. एक नितळ इमेज आशिल्लो, अभ्यासू आनी २४ वरां लोकां खातीर उपलब्ध आशिल्लो फुडारी वगडायलो, अश्यो प्रतिक्रिया फोंडेचे लोक उक्तायतात. तांच्या मरणान फकत फोंडें मतदारसंघाचेच न्हय, तर गोंयच्या भावी फुडारपणाचें व्हड लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
