भांगरभूंय | प्रतिनिधी
पणजीः फिजिओथेरपिस्ट, समाजसेवक आनी फोंडेंचे काँग्रेस फुडारी डॉ. केतन भाटीकार (41) हांच्या अकस्मात मरणाक लागून पुराय गोंयांत दुख्ख पातळ्ळां. नामनेचे फिजियोथेरपिस्ट म्हूण वळख निर्माण करतनाच तांणी गोंयच्या राजकी आनी समाजीक मळार वेगळीच वळख निर्माण केल्ली. आमदार जावन गोंयांत राजकी मळार काम करपाचें तांचे सपन अपुरे उरले अशी प्रतिक्रिया उक्तावपाक लागल्यात. तांच्या मरणाक लागून राजकी, वैजकी आनी समाजीक मळावेल्या जायत्या जाणांनी खर दुख्ख उक्तायलां.
मगो पक्षांतल्यान तांणी आपली राजकी कारकीर्द घडयली. सुरवेक भारतीय भाषा सुरक्षा मंचा वरवीं तांणी पणजी विधानसभा वेंचणूक लढयिल्ली. 2022 वर्सा मगो पक्षाच्या उमेदवारीचेर डॉ. भाटीकार हांणी भाजपाचे फुडारी रवी नायक हांचे आड विधानसभा वेंचणूक लढयल्ली आनी फकत 70 मतांनी ते हारिल्ले. हालींच रद्द जाल्ले विधानसभा पोटवेंचणुकेंत काँग्रेस पक्षाचे ते उमेदवार आशिल्ले. हे खातीर तांणी प्रचारुय बरोच केल्लो. पूण न्यायालयाच्या आदेशा उपरांत मतदान जावचे एक दीस आदीं विधानसभा वेंचणूकच रद्द जाली.
डॉ. केतन भाटीकार हांच्या मरणाचेर जायत्या जाणांनी उक्तायलें दुख्ख……
वैजकी मळाचें व्हड लुकसाण: मुख्यमंत्री
फिजिओथेरपिस्ट डॉ. भाटीकार हांच्या मरणाक लागून खर दुख्ख जालां. तांच्या मरणाक लागून वैजकी मळाचें व्हड लुकसाण जालां. तांच्या मरणाचेर हांव दुख्ख उक्तायतां अशें मुख्यमंत्री, डॉ. प्रमोद सावंत हांणी सांगलें.
योगदान सदांच याद उरतलें: गोवा प्रदेश काँग्रेस
गोवा प्रदेश काँग्रेस समितीन डॉ. भाटीकार हांच्या मरणाचेर खर दुख्ख उक्तायलां. लोकसेवे खातीर तांणी केल्ले काम आनी पक्ष आनी समाजाक दिल्ले योगदान सदांच आदर आनी उपकारान याद उरतले अशें राज्य काँग्रेसीन म्हणलां.
गतीशील फुडारी गोंयान वगडायलो: प्राचार्य सुभाष वेलिंगकार
डॉ. भाटीकार अनिश्चीतपणान आनी वेळा पयलींच भायर पडले. समाजीक वावराची तळमळ आनी थारायिल्ल्यो गजालीं चालीक लावपाची प्रचंड तांक आशिल्ले झुजारी कार्यकर्ते आनी कुशळ संघटक, एक बरें व्यक्तिमत्व अचकीत भायर पडले. गोंयान एक गतीशील फुडारी वगडायलो हें निश्चीत! तांच्या कुटुंबाच्या दुख्खांत आमी वांटेकार जातात. प्राचार्य सुभाष वेलिंगकार हांणी ह्या उतरांनी तांकां आर्गां ओंपली.
जिद्द, संघर्श हांचो दुर्दैवी शेवट: आदले खासदार अॅड. नरेंद्र सावयकार
विचारसरणेचे नदरेन आमी राजकारणाच्या उरफाट्या वटांनी आशिल्ले. डॉ. भाटीकार हांणी ही प्रॅक्टीस करपी लोकांक दोतोर म्हणूंक मेळचे हे खातीर खूब यत्न केले. हांव खासदार आसतना दिल्लीक डॉ. भाटीकार येताले. दोगूय मेळून जायत्या जाणांक मेळ्ळे. तातूंत तांकां येस मेळ्ळें. ते सहजपणान हार मानपी नाशिल्ले हें स्पश्ट दिसतालें. निमाणे मेरेन ते जिखपाची जिद्द घेवन वावुरले. जिवीत खरेंच अनिश्चीत आसा. डॉ. केतन भाटीकार हांकां आर्गां.
डॉ. केतन भाटीकार हांच्या मरणा विशीं मगो पक्षाचे फुडारी आनी वीज मंत्री सुदीन ढवळीकार, गोवा प्रदेश काँग्रेसीचे अध्यक्ष अमित पाटकार, विरोधी पक्ष फुडारी युरी आलेमांव, गोवा फॉरवर्ड पक्षाचे फुडारी आनी आमदार विजय सरदेसाय हांचे सयत जायत्या जाणांनी दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
