भांगरभूंय | प्रतिनिधी
पणजीः फिजिओथेरपिस्ट, समाजसेवक आनी फोंडेंचे काँग्रेस फुडारी डॉ. केतन भाटीकार (41) हांकां शुक्रारा मरण आयलें. अनमोड घांटांतल्यान प्रवास करतना तांकां सोरोप चाबिल्ल्यान मरण आयलें. ते दांडेलीच्यान गोंयांत परत येतना अनमोड घांटात राविल्ले तेन्ना तांकां सोरोप चाबलो.
मेळिल्ले म्हायती प्रमाण, तांकां फांतोडेच्या 3.30 वरांच्या सुमाराक धारबांदोडें भलायकी केंद्रांत हाडिल्लें. थंयच्या दोतोरांनी तांकां मरण आयिल्ल्याचें सांगलें.
तांच्या पांयाचेर जखम जाल्ली. उपरांत जीएमसींतल्या दोतोरांच्या पंगडान येवन पोस्टमॉर्टम केलो. पोस्टमॉर्टम अहवाला प्रमाण डॉ. केतन भाटीकार हांकां एकाच सुवातेर दोन फावटीं सोरपान चाबिल्ल्याचे स्पश्ट जालें. ताका लागून विख रोखडेच कुडींत पातळिल्ल्यान तांकां मरण आयलें.
डॉ. केतन कीर्तिकुमार भाटीकार हे वेवसायान फिजियोथेरपिस्ट आशिल्ले. फोंडें विधानसभेची पोटवेंचणूक रद्द जाले उपरांत तांणी सर्वोच्च न्यायालयांत याचिका दाखल केल्ली. ते याचिकेचेर आयज सुनावणी जावपाची आशिल्ली.
“डॉ. केतन भाटिकर हांच्या मरणान आमकां खर दुख्ख जालां. तांची लोकसेवे खातीर आशिल्ली तळमळ आनी पक्ष तशेंच समाजा खातीर दिल्लें योगदान सदांच व्हड मानान आनी कृतज्ञतेन याद उरतले.” अशी आर्गा कॉंग्रेसीन ओंपल्यांत.
मजगतीं, डॉ. केतन भाटीकार हांची कूड 11 वरांचेर फोंड्यां तांच्या घरा हाडटले. सांजेच्या 4 वरांचेर तांचेर निमणे संस्कार जातले.
योगायोग…. 15 म्हयने, 15 तारीख, 3 फुडारी….
आदले आमदार लवू मामलेदार हांचो खून 15 फेब्रुवारी 2025 दिसा जाल्लो. उपरांत शेतकी मंत्री रवी नायक हांकां 15 ऑक्टोबर 2025 दिसा काळजाचो आताक येवन मरण आयलें. आतां काँग्रेस फुडारी डॉ. केतन भाटीकार हांकां सोरोप चाबिल्ल्यान मरण आयलें. म्हयने वेगवेगळे, पूण तारीख समान. फाटल्या 15 म्हयन्यांत फोंडें मतदारसंघातल्या 3 फुडाऱ्यांक 15 तारखेरुच मरण आयलें. फक्त योगायोग.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
