भांगरभूंय | प्रतिनिधी
आतां उमेदवारांक परतून एकदां हे परिक्षेची तयारी करची पडटली. इतली म्हत्वाची परिक्षा म्हणटगीच साहजिकूच चिंता आनी भंय आयलोच.
वैजकी म्हाविद्यालयांत प्रवेशा खातीर इत्सूक आशिल्ल्या उमेदवारां खातीर नीट म्हणल्यारच राष्ट्रीय पात्रताय तशेंच प्रवेश परिक्षा घडून येता. केंद्र सरकाराची स्वायत्त संस्था आशिल्ली नॅशनल टॅस्टिंग एजन्सी ही परिक्षा घडोवन हाडटा. नीट परिक्षे वांगडाच ही संस्था जेईई, युजिसी नॅट, जिपॅट सारख्यो भोव म्हत्वाच्यो परिक्षाय दर वर्सा घेता. ह्या वर्साक 3 मे दिसा भारतभरच्या 552 शारांनी आनी 14 आंतरराष्ट्रीय सुवातींनी नीट परिक्षा घडून आयिल्ली. बावीस लाखां परस चड प्रवेश इत्सूक उमेदवार हे परिक्षेक बशिल्ले. आतां ही परिक्षा कथीत पेपर फुटीच्या कारणाक लागून रद्द जाल्या.
हे परिक्षेक बसपी उमेदवार तीन चार वर्सां तयारे खातीर भोव कश्ट घेतात. सादारण आठवी यत्ते सावन भुरगे हे परिक्षेचे तयारेक लागतात. कांय जाण उपचारीक शिक्षण एक दोन वर्सां खातीर स्थगीत दवरून लेगीत हे परिक्षेची तयारी करतात. पालक लाखांनी रुपया मोडून आपल्या भुरग्यांक कोचिंग वर्गांत धाडटात. गांवगिऱ्या वाठारांतले भुरगे लांबचें अंतर हुपून हे परिक्षे खातीर खाशेल्या वर्गांक हाजेरी लायतात. परिक्षेच्या तयारेंत वर्सभर घर, शाळा आनी कोचिंग वर्ग इतल्या पुरतेंच तांचें जिवीत सिमीत जाल्लें आसता. एकदांची परिक्षा सोंपली म्हणटकच भुरगीं तणाव मेकळीं जातात. परिक्षेचो ताण गेल्ल्याची खोस तांच्या तोंडार आसता. निकालाची तीं आतुरतायेन वाट पळयतात. आनी अकस्मात तांकां परिक्षाच रद्द जाल्ल्याचें कळटा. कितलो मानसीक आघात जाता आसतलो तांचेर? नीट परिक्षेचे बाबतींत हाचे आदींय अश्यो घडणुको घडल्यात. आयच्या अत्याधुनीक तंत्रज्ञानाच्या युगांतय भोव गरजेचीं गुपितांय सांबाळूंक संबंदीत अधिकारिणी नापास जाता तेन्ना खात्रेन नैतीक आनी कायदेशीर मार्गान ह्या सगल्या घोळाक तीच जापसालदार थारता. परिक्षा मंडळ गरजेची जतनाय घेवपाक अपेशी थारता ताचो फटको लाखांनी निरागस भुरग्यांक सोंसचो पडटा.
ह्यो परिक्षा भोव म्हत्वाच्यो आशिल्ल्यान तयारे खातीर कांय कोचिंग वर्गाचे धनी आनी शिक्षक परिक्षेंत संभावीत अश्या प्रस्नांच्यो अदमास प्रस्नपत्रिका तयार करतात. ह्या वर्साक अशेच एके प्रस्न पत्रिकेंत रसायनशास्त्राचे 45 आनी जीवनशास्त्राचे 90 प्रस्न प्रत्यक्ष प्रस्नपत्रिकेंतल्या प्रस्नां कडेन हुबेहूब जुळटात म्हणपाचें सिद्ध जालां.
नीट परिक्षेचे बाबतींत हाचे आदींय पेपर फुटप, विद्यार्थ्यांक पात्र नासतना आलायते गूण मेळप, परिक्षा घेतना तंत्रीक दोश येवप अश्यो घडणुको घडल्यात. 2024 वर्साचे परिक्षेंत वट्ट 67 उमेदवारांक 720 पैकीं 720 गूण मेळपाची कल्पने भायली घडणूक हेच परिक्षेचे बाबतींत घडिल्ली. अश्या घडणुकांनी देशांतल्या ह्या सगल्यांत म्हत्वाच्या परिक्षा मंडळाच्या विस्वासाहर्ततेचेर प्रस्नचिन्न उबें जाता.
अश्यो गजाली घडपा फाटलें एक म्हत्वाचें कारण म्हणल्यार शाराशारांत उबीं जाल्लीं कोचिंग सेंटरां. ह्या परिक्षां खातीरचो अभ्यासक्रम आनी चालंत शालेय अभ्यासक्रम हातूंतल्या तफावतीक लागून भुरग्यांक म्हारग्या कोचिंग सेंटरांत प्रवेश घेवचो पडटा. हीं केंद्रां अवाढव्य फी आकारतात. आपली जायरात करपाक आपल्या संस्थेंतले कितले जाण नीट, जेईई सारखे परिक्षेंत पात्र थारले तें सांगपी लाखांनी रुपयांच्यो जायराती राष्ट्रीय दिसाळ्यांनी प्रसिद्ध करतात. केन्ना केन्ना उंचेल्या क्रमांकान पास जाल्ल्या एखाद्या भुरग्याचो फोटो आनी नांव दोन संस्थांच्या जायरातींत आमकां दिसून येता. ह्या संस्थांचो उद्देश शिक्षणीक प्रसार न्हय जाल्यार धंद्याचो विस्तार आसता.
हे खेपेचो नीट परिक्षेचो घोळ हो फक्त एकाच राज्या पुरतो मर्यादीत ना. ताचीं पाळांमुळां समाज माध्यमां वरवीं साबार राज्यांनी पावल्यांत म्हणपाचें उकतें जालां. हाचे वेल्यान ताची दाहकता लक्षांत येता. ही अदमास प्रस्नपत्रिका जांचे मेरेन पावली त्या उमेदवारांनी खात्रेन तिचो फायदो करून घेतलो. पूण जे उमेदवार गंभिरतायेन, प्रामाणीकपणान, दीस रात एक करून पुराय तयारेन हे परिक्षेक बसल्यात तांचेर हो अन्याय. ताची नैतीक जापसालदारकी कोणाची?
हें प्रकरण केंद्रीय अन्वेशण खात्या कडेन चौकशे खातीर गेलां. चौकशी जातली तेन्ना जातली. ताचो तपास, संबंदितांक ख्यास्त ह्यो गजाली लोक कांय काळान विसरूनय वतले. पूण ज्या पात्र उमेदवारांचेर अश्या घडणुकांक लागून अन्याय जावन तांच्या मानसिकतायेचेर ताचो परिणाम जाला ताचें कितें?
आतां उमेदवारांक परतून एकदां हे परिक्षेची तयारी करची पडटली. इतली म्हत्वाची परिक्षा म्हणटगीच साहजिकूच चिंता आनी भंय आयलोच. सुदारीत वेळापत्रकाक धरून परिक्षा परतून केन्ना जातली, ती खंयच्या केंद्रार दिवची पडटली हे प्रस्न आसातच. ही अनिश्चितता उमेदवारांच्या आत्मविस्वासाक वेर हाडपी आसा. कितल्याश्याच जाणांनी परिक्षेक परतून बसचे नात म्हणपाचो निर्णय घेतला.
एखादो क्रिकेट खेळगडो बरी फलंदाजी करता. पूण केन्ना केन्ना कांय कारणा खातीर ताचो रिदम बिघडटा आनी तो आवट जाता. नीट सारखे परिक्षेकय हो नेम लागू जाता. नीट परिक्षा तोंडार आसतना कोचिंग वर्गांनी सराव परिक्षा जातात. भुरग्यांक ह्या परिक्षांतल्यान आपले क्षमतायेची वळख जाता. आत्मविस्वास मेळून अभ्यासाचे नदरेन भुरगीं परिक्षेक पुराय तरेन तयार जातात. आतां हे परिक्षे खातीर इत्सूक उमेदवारांक परतून तयारी करची पडटली वा आसा तेच तयारेंत परिक्षेक बसपा बगर पर्याय उरचो ना.
अश्यो गजाली म्हणल्यार आमचे शिक्षण वेवस्थेंतल्या दुबळेपणाच्यो देखी. नवें राष्ट्रीय शिक्षण धोरण आयलां खरें, पूण संबंदीत घटक ह्या धोरणा कडेन जुळोवन घेवपाक उणे पडल्याक काय? काय तांकां हें नवें धोरण आनी नवे बदल समजूनच घेवपाचें नात?
आमचे प्रधानमंत्री भुरग्यां खातीर ‘परिक्षा पे चर्चा’ ही संवाद रुपी कार्यावळ नेमान घडोवन हाडटात. अश्यो कार्यावळी हाचे फुडें फक्त परिक्षा दितल्यां खातीरच न्हय तर घेतल्यां खातीर जावच्यो पडटल्यो!
अनंत अग्नी
9422439903
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
