भांगरभूंय | प्रतिनिधी
पणजी: गोवा चेंबर ऑफ कॉमर्स अॅण्ड इंडस्ट्रीचो बायलां विभाग आनी फायर (फोरम फॉर इनोव्हेशन इन्क्युबेशन रिसर्च अॅण्ड आंत्रप्रेन्योरशीप) हांच्या जोड पालवान 7व्या बिझनेस दिवा सर्तीचें आयोजन केलां. हो उपक्रम गोंयांतल्या बायलां उद्देजकांक सक्षम करपा खातीर आनी नव्या उद्देगांक प्रोत्साहन दिवपा खातीर सुरू केल्ल्याची म्हायती बायलां विभागाच्यो अध्यक्षा सँड्रा फर्नांडीस हांणी दिली. बिरेस्तारा पणजेंत जाल्ले पत्रकार परिशदेंत त्यो उलयताल्यो. ह्या वेळार पल्लवी साळगांवकार, रेणू अंबाललूर आनी हेर पदाधिकारी हाजीर आशिल्ले.
फर्नांडीस हांणी सांगलें, सर्ती खातीर 18 वर्सां पिराये वेल्यो बायलो अर्ज करूंक शकतात. अशा बायलांचो वेवसाय चालू स्थितीतलो आसप गरजेचें आसा. तशेंच नाविन्यपूर्ण वेवसायाची कल्पना आशिल्ल्यो बायलो लेगीत हे खातीर अर्ज करूंक शकतात. हातूंत स्टार्टअप, स्केलअप आनी गांवगिऱ्या वाठारांतलीं बायलां उद्देजक अशे तीन विभाग आसतले. स्टार्टअपांत दोन वर्सां परस उण्या कालावधी पसून कार्यरत आशिल्ले वेवसाय गृहीत धरतले. स्केलअपांत दोन वर्सां परस चड कालावधी पसून कार्यरत आशिल्ल्या वेवसायांचो आस्पाव आसतलो.
तांणी म्हणलें, सर्तींतल्या जैतिवंता खातीर रोख इनामां सयत, फायर कडल्यान वेवसाय विकासा खातीरचें मार्गदर्शन आनी सुविधा, सहाय्य क्षेत्रांतल्या तज्ञां कडल्यान मार्गदर्शनाची संदी, हेरां कडेन वेवसायीक संबंद जोडपाची संद मेळटली. अर्ज प्रक्रिया, म्हत्वाच्यो तारखो, निमाणी फेरी आनी इनामां वितरण ह्या विशया वेले फुडले तपशील रोखडेच जाहीर करतले. ही सर्त बायलां खातीर एक म्हत्वाची माची आसा. हाचे वरवीं नाविन्यपूर्ण वेवसाय कल्पना, आव्हानां आनी ताचे वेल्या उपायांचेर विशेश लक्ष केंद्रीत करतात. बायलां उद्देजकांक प्रोत्साहन दिवन सक्षम करप हे सर्तीचो उद्देश आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
