भांगरभूंय | प्रतिनिधी
पंचायतिनूय काम थांबोवपाची नोटीस केली जारी
पणजी: फॅशन डिझायनर तरूण तेहलानी हांच्या घर विस्ताराक नगर नियोजन खात्यान दिल्लो परवानो फाटीं घेतला. पंचायतीन लेगीत काम थांबयात नोटीस जारी केल्या. सर्वोच्च न्यायालयाच्या आदेशा उपरांत हो निर्णय घेतला. हें पोंबुर्फा हांगासरल्या थळव्यांचें अर्दें जैत आसा. ह्या बांदकामांतल्यान हेर अनियमीतताये विशीं आमचो लढो सुरूच उरतलो अशें धिरेंद्र फडते हांणी सांगलें. बिरेस्तारा पणजेंत घेतिल्ले पत्रकार परिशदेंत ते उलयताले. ह्या वेळार एल्वीस गोम्स आनी हेर थळावे हाजीर आशिल्ले.
फडते हांणी सांगलें, प्रकल्पांतल्या अवैध गजालीं विशीं फाटलीं खूबशीं वर्सां आमची लढाय सुरू आशिल्ली. ह्या प्रकल्पाक पंचायत आनी नगर नियोजन खात्यान चुकीचे पद्दतीन परवाने दिल्ले. खात्यान तेहलानी हांकां 2001च्या प्रादेशीक आराखड्या प्रमाण बांदकाम परवानो दिल्लो. ते प्रमाण सुमार 2800 चौमि सेटलमेंट क्षेत्र दिल्लें. मात प्रादेशीक आराखडो 2021 प्रमाण हें क्षेत्र 1070 चौमि आसा. हाका लागून प्रादेशीक आराखडो 2001 प्रमाण परवानगी दिल्ल्यान हांगासरलें पर्यावरण संवेदनशील क्षेत्र घाताक येता.
हाचे आड आमी पंचायत तशेंच खात्या कडेन कागाळ केल्ली. पूण तीन वर्सां जालीं हाचे कडेन आडनदर केली. उपरांत आमी उच्च न्यायालयांत याचिका दाखल केल्ली. पूण निकाल आमचे वटेन लागलो ना. तरी लेगीत आमी आमचो लढो सुरूच दवरपाचें थारायलें. आमी सर्वोच्च न्यायालयांत ह्या निर्णयाक आव्हान दिल्लें. सर्वोच्च न्यायालयाच्या निर्णया उपरांत आतां खात्यान परवानो फाटीं घेतला, आनी प्रकल्पाचो आराखडो प्रादेशीक आराखडो 2021 प्रमाण करपा खातीर सांगलां.
एल्वीस गोम्स हांणी म्हणलें, सर्वोच्च न्यायालयान हो निर्णय मार्च म्हयन्यांत दिल्लो. ताची अंमलबजावणी करपा खातीर नगर नियोजन खात्याक दोन म्हयन्यांचो काळ लागलो ही शोकांतिका आसा. ह्या प्रकरणांत पुराय प्रशासन तेहलानी हांचे वटेन आशिल्लें. आयज तेहलानी हांकां धडो मेळ्ळो. भायल्यान येवन गोंयांत दोंगर, न्हंयो, पर्यावरण नश्ट करूंक येवचें ना हो संदेश हातूंतल्यान मेळ्ळा. गोंयांतल्या लोकांनी पर्यावरण नश्ट करपी बांदकाम प्रकल्पां विरोधांत एकठांय येवप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
