भांगरभूंय | प्रतिनिधी
पणजी: गोंयांतल्या क (सी) गटांत येवपी नगरपालिकांक कर्मचाऱ्यांचो पगार आनी पेन्शना खातीर वर्साक 75 लाखांचें अनुदान मेळटलें. पगारा खातीर 50 लाख जाल्यार पेन्शना खातीर 25 लाखांचें अनुदान दिवपी येवजणेक सरकारान मान्यताय दिल्या. ही येवजण 5 वर्सां लागू आसतली.
‘अ’ आनी ‘ब’ गटांतल्या नगरपालिकांचे तुळेन ‘क’ गटांत येवपी नगरपालिकांची येणावळ उणी आसता. हाका लागून ‘क’ गट पालिकांच्या कर्मचाऱ्यांक वेळार पगार मेळना. पेन्शन लेगीत वेळार मेळना. हाचे खातीर अनुदान वाडोवपाची मागणी पालिकां कडल्यान जाताली. संबंदीत आमदारांनी लेगीत विधानसभेंत ही मागणी केल्ली. निमाणी अनुदान दिवपी येवजण लागू जाल्या. ही येवजण 5 वर्सां खातीर आसतली. पालिकांच्या अर्थीक स्थितीचो नियाळ घेवप 5 वर्सां उपरांत अनुदानाची रक्कम वा येवजणेचो फेरविचार जातलो. ही रक्कम फक्त पगार आनी पेन्शना खातीर वापरची पडटली. नगरपालिकांक निधी सामको उणो जालो जाल्यार प्रशासकी खर्चा खातीर आनीक निधी सरकार दिवंक शकता. अनुदानाची रक्कम दोन हप्त्यांनी मेळटली. पयल्या हपत्याच्या खर्चाची प्रमाणपत्रां सादर केले उपरांत दुसरो हप्तो मेळटलो. अनुदानाची रक्कम त्याच वर्सा खातीर वापरची पडटली. अश्यो अटी येवजणेंत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
